ಫೇಸ್ ಬುಕ್ ವಿವಾದ: ಕಾಂಗ್ರೆಸ್-ಬಿಜೆಪಿ ಕದನ

 ಫೇಸ್ ಬುಕ್ ವಿವಾದ: ಕಾಂಗ್ರೆಸ್-ಬಿಜೆಪಿ ಕದನ

ನವದೆಹಲಿ: ಫೇಸ್‌ಬುಕ್ ಇಂಡಿಯಾದ ‘ದುವರ್ತನೆ’ ಬಗ್ಗೆ ಚರ್ಚಿಸಲು ಸ್ಥಾಯಿ ಸಮಿತಿ ಸಭೆ ಕರೆಯುವುದಾಗಿ ಪ್ರಕಟಿಸಿದ ಮಾಹಿತಿ ತಂತ್ರಜ್ಞಾನದ ಸಂಸದೀಯ ಸಮಿತಿ ಅಧ್ಯಕ್ಷ ಶಶಿ ತರೂರ್ ಮತ್ತು ಬಿಜೆಪಿ ಮಧ್ಯೆ ’ಕದನ’ ತೀವ್ರಗೊಂಡಿದ್ದು, ತರೂರ್ ಅವರನ್ನು ಸ್ಥಾಯಿ ಸಮಿತಿ ಅಧ್ಯಕ್ಷತೆಯಿಂದ ಕಿತ್ತು ಹಾಕುವಂತೆ ಬಿಜೆಪಿಯ ಇಬ್ಬರು ಸಂಸತ್ ಸದಸ್ಯರು ಲೋಕಸಭಾಧ್ಯಕ್ಷ ಓ ಬಿರ್ಲಾ ಅವರಿಗೆ 2020 ಆಗಸ್ಟ್ 20ರ ಗುರುವಾರ ದೂರು ನೀಡಿ ಆಗ್ರಹಿಸಿದರು.

ಶಶಿ ತರೂರ್ ಮತ್ತು ಬಿಜೆಪಿಯ ನಿಶಿಕಾಂತ್ ದುಬೆ ಅವರು ಪರಸ್ಪರರ ವಿರುದ್ಧ ತಮ್ಮ ಸವಲತ್ತುಗಳ ಉಲ್ಲಂಘನೆಯ ಆರೋಪ ಮಾಡಿ, ಲೋಕಸಭಾಧ್ಯಕ್ಷ ಓಂ ಬಿರ್ಲಾ ಅವರಿಗೆ ದೂರು ಸಲ್ಲಿಸಿದ ನಂತರ, ಕೇಸರಿ ಪಕ್ಷದ ಸಂಸದರು ಕಾಂಗ್ರೆಸ್ ನಾಯಕನನ್ನು ಹುದ್ದೆಯಿಂದ ತೆಗೆದುಹಾಕುವಂತೆ ಕೋರಿ ಬಿರ್ಲಾ ಅವರಿಗೆ ಮತ್ತೊಂದು ಮನವಿ ಸಲ್ಲಿಸಿದರು..

‘ಮಾಹಿತಿ ತಂತ್ರಜ್ಞಾನದ ಸಂಸದೀಯ ಸ್ಥಾಯಿ ಸಮಿತಿಯ ಅಧ್ಯಕ್ಷರಾಗಿ ಕಾರ್ಯನಿರ್ವಹಿಸಲು ಇನ್ನೊಬ್ಬ ಸದಸ್ಯರನ್ನು ಆಯ್ಕೆ ಮಾಡಲು ಲೋಕಸಭೆಯಲ್ಲಿನ ಕಾರ್ಯವಿಧಾನ ಮತ್ತು ವ್ಯವಹಾರದ ನಿಯಮಗಳ ನಿಯಮ ೨೫೮ (೩)ಕ್ಕೆ ಸಂಬಂಧಿಸಿದಂತೆ ನಿಯಮ ೨೮೩ನ್ನು ಬಳಸಿದ್ದಕ್ಕಾಗಿ’ ತರೂರ್ ಅವರನ್ನು ಮಾಹಿತಿ ತಂತ್ರಜ್ಞಾನ ಸ್ಥಾಯಿ ಸಮಿತಿಯ ಅಧ್ಯಕ್ಷತೆಯಿಂದ ಕಿತ್ತು ಹಾಕಬೇಕು ಎಂದು ನಿಶಿಕಾಂತ ದುಬೆ ಅವರು ಲೋಕಸಭಾಧ್ಯಕ್ಷರಿಗೆ ಮನವಿ ಮಾಡಿದರು.

"ವಿದೇಶಿ ಉಚ್ಚಾರಣೆಯೊಂದಿಗೆ ’ಸ್ಪೆನ್ಸೇರಿಯನ್’ ಇಂಗ್ಲಿಷ್‌ನಲ್ಲಿ ಮಾತನಾಡುವುದು ಒಬ್ಬ ವ್ಯಕ್ತಿಗೆ ತನ್ನದೇ ಆದ ರಾಜಕೀಯ ಮಹತ್ವಾಕಾಂಕ್ಷೆಗಳನ್ನು ಪೂರೈಸುವ ಸಲುವಾಗಿ ನಮ್ಮ ಅದ್ಭುತ ಸಂಸದೀಯ ಸಂಸ್ಥೆಗಳು / ಅಂಗಗಳನ್ನು ಕಡೆಗಣಿಸಲು ಮತ್ತು ನಮ್ಮ ಸಂವಿಧಾನವನ್ನು ದುರುಪಯೋಗಪಡಿಸಿಕೊಳ್ಳಲು ’ಹೌಸ್ ಆಫ್ ಕಾಮನ್ಸ್’ನ್ನು ಉಲ್ಲೇಖಿಸುವ ಸ್ವಾತಂತ್ರ್ಯವನ್ನು ನೀಡುವುದಿಲ್ಲ. ಸ್ಥಾಪಿತ ಕಾರ್ಯವಿಧಾನದ ಪ್ರಕಾರ ಮಾಹಿತಿ ತಂತ್ರಜ್ಞಾನದ ಸಂಸದೀಯ ಸಮಿತಿಯ ವ್ಯವಹಾರಗಳನ್ನು ನಿಯಂತ್ರಿಸಲು ಸಂಬಂಧಿಸಿದ ಸಮಸ್ಯೆಗಳನ್ನು ಎತ್ತುವ ಸಂದರ್ಭದಲ್ಲಿ, ನಾನು ’ಸವಲತ್ತು ಉಲ್ಲಂಘನೆ’ ಅಪರಾಧವನ್ನು ಮಾಡಿರುವುದಾಗಿ ತರೂರ್ ದೂರಿದ್ದಾರೆ’ ಎಂದು ದುಬೆ ಸಭಾಧ್ಯಕ್ಷರಿಗೆ ಬರೆದ ಪತ್ರದಲ್ಲಿ ತಿಳಿಸಿದ್ದಾರೆ.

"ಮಾಹಿತಿ ತಂತ್ರಜ್ಞಾನ ಸ್ಥಾಯಿ ಸಮಿತಿಯ ಅಧ್ಯಕ್ಷರಾಗಿ ಡಾ. ತರೂರ್ ಅವರು ಮುಂದುವರೆದಿರುವವರೆಗೂ ಲೋಕಸಭೆಯಲ್ಲಿನ ವ್ಯವಹಾರ ಮತ್ತು ನಡವಳಿಕೆಯ ನಿಯಮಗಳು ಮತ್ತು ನಿಮ್ಮ ಒಳ್ಳೆಯತನದಿಂದ ಹೊರಡಿಸಲಾದ ನಿರ್ದೇಶನಗಳಿಗೆ ಅನುಗುಣವಾಗಿ ಮಾಹಿತಿ ತಂತ್ರಜ್ಞಾನ ಸಮಿತಿಯ ವ್ಯವಹಾರಗಳನ್ನು ನಿಯಂತ್ರಿಸುವುದು ಈಗ ಅಸಾಧ್ಯವಾಗಿದೆ’ ಎಂದು ದುಬೆ ತಿಳಿಸಿದ್ದಾರೆ.

ಸಂಸದೀಯ ಸ್ಥಾಯಿ ಸಮಿತಿಯಲ್ಲಿ ಮೊದಲು ಚರ್ಚಿಸದೆ ಫೇಸ್‌ಬುಕ್ ಅಧಿಕಾರಿಗಳನ್ನು ಕರೆಸಿಕೊಳ್ಳುವ ಉದ್ದೇಶದ ಬಗ್ಗೆ ಸಾರ್ವಜನಿಕವಾಗಿ ಮಾತನಾಡಿದ್ದಕ್ಕಾಗಿ ಬಿಜೆಪಿಯ ಮತ್ತೊಬ್ಬ ಸಂಸದ ರಾಜ್ಯವರ್ಧನ್ ಸಿಂಗ್ ರಾಥೋಡ್ ಅವರು ತರೂರ್ ವಿರುದ್ಧ ಬಿರ್ಲಾ ಅವರಿಗೆ ಪತ್ರ ಬರೆದಿದ್ದಾರೆ.

"ಯಾರನ್ನು ಕರೆಸಲಾಗುತ್ತದೆ ಮತ್ತು ಸಭೆಯ ಕಾರ್ಯಸೂಚಿ ಯಾವುದು ಎಂಬುದರ ಕುರಿತು ಹೇಳಿಕೆಗಳನ್ನು ನೀಡುವುದು ಸಂಪೂರ್ಣವಾಗಿ ಲೋಕಸಭೆಯ ಕಾರ್ಯವಿಧಾನಗಳನ್ನು ಉಲ್ಲಂಘಿಸುತ್ತದೆ. ಐಟಿ ಸಮಿತಿ ಅಧ್ಯಕ್ಷರು ಮಾಧ್ಯಮಗಳೊಂದಿಗೆ ಮಾತನಾಡಿರುವುದು ಸಮಿತಿಯ ಕಾರ್ಯವೈಖರಿಯನ್ನು ಹಾಳು ಮಾಡಿದೆ’ ಎಂದು ರಾಥೋಡ್ ಹೇಳಿದ್ದಾರೆ.

"ನಮ್ಮ ದೇಶದ ನಾಗರಿಕರ ಹಕ್ಕುಗಳ ರಕ್ಷಣೆಗಾಗಿ ಸಮಿತಿಯ ಮುಂದೆ ವಿಚಾರಣೆಗೆ ಕರೆಸಿಕೊಳ್ಳಬೇಕು ಎಂದು ಭಾವಿಸುವವರನ್ನು ಕರೆಸಿಕೊಳ್ಳುವಲ್ಲಿ ಐಟಿ ಸಮಿತಿ ಸದಸ್ಯರಿಗೆ ಯಾವುದೇ ಸಮಸ್ಯೆ ಇಲ. ಆದರೆ ಈ ವಿಷಯವನ್ನು ಮೊದಲು ಸಮಿತಿಯಲ್ಲಿ ಚರ್ಚಿಸಬೇಕು’ ಎಂದು ಮಾಜಿ ಕೇಂದ್ರ ಸಚಿವರಾದ ರಾಥೋಡ್ ಹೇಳಿದರು.

ವಾಲ್ ಸ್ಟ್ರೀಟ್ ಜರ್ನಲ್ ನಲ್ಲಿ ಪ್ರಕಟವಾದ ವರದಿಯ ಹಿನ್ನೆಲೆಯಲ್ಲಿ ಸ್ಥಾಯಿ ಸಮಿತಿಯು ತನ್ನ ದ್ವೇಷ ಭಾಷಣ ನಿಯಮಗಳ ಬಗ್ಗೆ ಫೇಸ್‌ಬುಕ್ ಅಧಿಕಾರಿಗಳಿಂದ ವಿವರಣೆ ಕೇಳಲು ಬಯಸಿದೆ ಎಂದು ತರೂರ್ ಹೇಳಿದ ನಂತರ ವಿವಾದ ಪ್ರಾರಂಭವಾಯಿತು. ಸಾಮಾಜಿಕ ಮಾಧ್ಯಮ ದೈತ್ಯ ಸಂಸ್ಥೆಯಾದ ಫೇಸ್ ಬುಕ್, ಭಾರತದ ಕೆಲವು ಆಡಳಿತ ಪಕ್ಷದ ರಾಜಕಾರಣಿಗಳಿಗೆ ಇಂತಹ ನಿಯಮಗಳನ್ನು ಅನ್ವಯಿಸಲು ನಿರಾಕರಿಸಿದೆ ಎಂದು ವರದಿ ಹೇಳಿತ್ತು.

ಭಾರತದ ತನ್ನ ಹಿರಿಯ ನೀತಿ ಕಾರ್ಯನಿರ್ವಾಹಕರೊಬ್ಬರು ಆಂತರಿಕ ಸಂವಹನದಲ್ಲಿ ಮಧ್ಯಪ್ರವೇಶಿಸಿ, ಕೋಮು ಪ್ರಚೋದನೆಯ ಪೋಸ್ಟ್‌ಗಳನ್ನು ಪ್ರಕಟಿಸಿದ ತೆಲಂಗಾಣದ ಬಿಜೆಪಿ ಶಾಸಕರೊಬ್ಬರ ಮೇಲಿನ ಶಾಶ್ವತ ನಿಷೇಧದ ಸಲಹೆಯ ಸಂವಹನವನ್ನು ತಡೆಯಲು ಒತ್ತಾಯಿಸಿದರು ಎಂದು ಅಮೆರಿಕದ ಪತ್ರಿಕೆಯು ಶುಕ್ರವಾರ ಪ್ರಕಟವಾದ ವರದಿಯಲ್ಲಿ, ಹೆಸರಿಸದ ಫೇಸ್‌ಬುಕ್ ಒಳಗಿನ ಅಪರಿಚಿತ ವ್ಯಕ್ತಿಗಳ ಸಂದರ್ಶನಗಳನ್ನು ಉಲ್ಲೇಖಿಸಿ, ತಿಳಿಸಿತ್ತು.

ವಿವಾದದ ಬಗ್ಗೆ ಪ್ರತಿಕ್ರಿಯಿಸಿದ ಫೇಸ್‌ಬುಕ್, ಕಂಪನಿಯ ಸಾಮಾಜಿಕ ಮಾಧ್ಯಮ ವೇದಿಕೆಯು ದ್ವೇಷದ ಮಾತು ಮತ್ತು ಹಿಂಸಾಚಾರವನ್ನು ಪ್ರಚೋದಿಸುವ ವಿಷಯವನ್ನು ನಿಷೇಧಿಸುತ್ತದೆ ಎಂದು ಹೇಳಿತ್ತು. ರಾಜಕೀಯ ನೀತಿಗಳನ್ನು ಪರಿಗಣಿಸದೆ ಈ ನೀತಿಗಳನ್ನು ಜಾಗತಿಕವಾಗಿ ಜಾರಿಗೊಳಿಸಲಾಗಿದೆ ಎಂದೂ ಫೇಸ್ ಬುಕ್ ಹೇಳಿತ್ತು.

"ಇನ್ನೂ ಹೆಚ್ಚಿನದನ್ನು ಮಾಡಬೇಕಾಗಿದೆ ಎಂದು ನಮಗೆ ತಿಳಿದಿದ್ದರೂ, ಇದನ್ನು ನಾವು ಜಾರಿಗೊಳಿಸುವಲ್ಲಿ ಪ್ರಗತಿ ಸಾಧಿಸುತ್ತಿದ್ದೇವೆ ಮತ್ತು ನ್ಯಾಯಸಮ್ಮತತೆ ಮತ್ತು ನಿಖರತೆಯನ್ನು ಖಚಿತಪಡಿಸಿಕೊಳ್ಳಲು ನಮ್ಮ ಪ್ರಕ್ರಿಯೆಯ ನಿಯಮಿತ ಲೆಕ್ಕಪರಿಶೋಧನೆಯನ್ನು ನಡೆಸುತ್ತಿದ್ದೇವೆ" ಎಂದು ಫೇಸ್‌ಬುಕ್ ವಕ್ತಾರರು ತಿಳಿಸಿದ್ದರು.