ಎನ್ ಡಿಎ ಬಿಹಾರ ಸೀಟು ಹಂಚಿಕೆ: ಜೆಡಿಯುಗೆ ೧೨೨, ಬಿಜೆಪಿಗೆ ೧೨೧ ಸ್ಥಾನ

 ಎನ್ ಡಿಎ ಬಿಹಾರ ಸೀಟು ಹಂಚಿಕೆ: ಜೆಡಿಯುಗೆ ೧೨೨, ಬಿಜೆಪಿಗೆ ೧೨೧ ಸ್ಥಾನ

ಪಾಟ್ನಾ: ಬಿಹಾರ ಮುಖ್ಯಮಂತ್ರಿ ನಿತೀಶ್ ಕುಮಾರ್ ಅವರು ರಾಜ್ಯ ವಿಧಾನಸಭಾ ಚುನಾವಣೆಗೆ ಮುನ್ನ ಬಿಜೆಪಿಯೊಂದಿಗೆ ಸೀಟು ಹಂಚಿಕೆ ವ್ಯವಸ್ಥೆಯನ್ನು 2020 ಅಕ್ಟೋಬರ್ 06ರ ಮಂಗಳವಾರ ಪ್ರಕಟಿಸಿದರು.

"ಜೆಡಿಯುಗೆ ೧೨೨ ಸ್ಥಾನಗಳನ್ನು ನೀಡಲಾಗಿದೆ. ಆ ಕೋಟಾ ಅಡಿಯಲ್ಲಿ ನಾವು ಎಚ್‌ಎಎಮ್‌ಗೆ ಏಳು ಸ್ಥಾನಗಳನ್ನು ನೀಡುತ್ತಿದ್ದೇವೆ. ಬಿಜೆಪಿಗೆ ೧೨೧ ಸ್ಥಾನಗಳಿವೆ. ಮಾತುಕತೆ ನಡೆಯುತ್ತಿದೆ, ಬಿಜೆಪಿ ತನ್ನ ಕೋಟಾ ಅಡಿಯಲ್ಲಿ ವಿಕಾಸಶೀಲ್ ಇನ್ಸಾನ್ ಪಕ್ಷಕ್ಕೆ ಸ್ಥಾನಗಳನ್ನು ನೀಡಲಿದೆ’ ಎಂದು ನಿತೀಶ್ ಕುಮಾರ್ ಮಾತುಕತೆಗಳ ಬಳಿಕ ಹೇಳಿದರು.

ಬಿಜೆಪಿ ತನ್ನ ಕೋಟಾದಿಂದ ವಿಐಪಿಗೆ ಆರು ಸ್ಥಾನಗಳನ್ನು ನೀಡಲಿದೆ ಎಂದು ಕುಮಾರ್ ನಂತರ ತಿಳಿಸಿದರು.

ಈ ಮಧ್ಯೆ, ಚಿರಾಗ್ ಪಾಸ್ವಾನ್ ಅವರ ಎಲ್‌ಜೆಪಿ ನಿಲುವನ್ನು ಬಿಜೆಪಿ ಖಂಡಿಸಿ, ಜೆಡಿಯು ಜೊತೆಗಿನ ಮೈತ್ರಿ "ಮುರಿಯಲಾಗದು" ಎಂದು ಹೇಳಿದೆ.

"ನಿತೀಶ್ ಕುಮಾರ್ ಬಿಹಾರದಲ್ಲಿ ನಮ್ಮ ನಾಯಕ ಎಂಬುದರಲ್ಲಿ ಯಾವುದೇ ಸಂದೇಹವಿಲ, ಕೇಂದ್ರದಲ್ಲಿ ಎಲ್‌ಜೆಪಿ ನಮ್ಮ ಮಿತ್ರ’ ಎಂದು ರಾಜ್ಯ ಬಿಜೆಪಿ ಮುಖ್ಯಸ್ಥ ಸಂಜಯ್ ಜೈಸ್ವಾಲ್ ಪತ್ರಿಕಾಗೋಷ್ಠಿಯಲ್ಲಿ ಹೇಳಿದರು.

"ಸೈದ್ಧಾಂತಿಕ ಭಿನ್ನಾಭಿಪ್ರಾಯಗಳನ್ನು’ ಉಲ್ಲೇಖಿಸಿ, ಬಿಜೆಪಿಯೊಂದಿಗೆ ಚುನಾವಣಾ ಹೋರಾಟ ನಡೆಸಲಾಗುವುದು ಎಂದು ಎಲ್‌ಜೆಪಿ ಈ ಹಿಂದೆ ಹೇಳಿತ್ತು.

ಎನ್‌ಡಿಎಯಿಂದ ಹೊರನಡೆದ ಒಂದು ದಿನದ ನಂತರ, ಚಿರಾಗ್ ಪಾಸ್ವಾನ್ ಕುಮಾರ್ ಅವರನ್ನು ಗುರಿಯಾಗಿಸಿಕೊಂಡು, ’ಬಿಹಾರ ಮುಖ್ಯಮಂತ್ರಿಯನ್ನು ಇನ್ನು ಮುಂದೆ ನಂಬುವುದಿಲ್ಲವಾದ್ದರಿಂದ ರಾಜ್ಯದಲ್ಲಿ ಬಿಜೆಪಿ ನೇತೃತ್ವದ ಸರ್ಕಾರ ಬೇಕು’ ಎಂದು ಹೇಳಿದರು.

"ನನ್ನ ರಾಜ್ಯದಲ್ಲಿ ಬಿಜೆಪಿ ನೇತೃತ್ವದ ಸರ್ಕಾರವನ್ನು ಹೊಂದಲು ನಾನು ಬಯಸುತ್ತೇನೆ ಎಂದು ನಾನು ಪದೇ ಪದೇ ಹೇಳಿದ್ದೇನೆ ಏಕೆಂದರೆ ನಾನು ಇನ್ನು ಮುಂದೆ ಮುಖ್ಯಮಂತ್ರಿಯನ್ನು ನಂಬುವುದಿಲ್ಲ. ಬಿಹಾರದಲ್ಲಿ ನಿಜವಾದ ಡಬಲ್ ಎಂಜಿನ್ ಸರ್ಕಾರವನ್ನು ನಾನು ಬಯಸುತ್ತೇನೆ’ ಎಂದು ಪಾಸ್ವಾನ್ ನುಡಿದರು.

ಕುಮಾರ್ ಅವರ ಜೆಡಿಯುಗೆ ಮತ ಚಲಾಯಿಸುವುದರ ವಿರುದ್ಧ ಎಲ್‌ಜೆಪಿ ಅಧ್ಯಕ್ಷರು ಜನರಿಗೆ ಮನವಿ ಮಾಡಿದರು ಮತ್ತು ವಿಧಾನಸಭಾ ಚುನಾವಣೆಯ ನಂತರ ತಮ್ಮ ಪಕ್ಷ ಮತ್ತು ಬಿಜೆಪಿಯ ಮೈತ್ರಿ ರಾಜ್ಯದಲ್ಲಿ ಅಧಿಕಾರಕ್ಕೆ ಬರಲಿದೆ ಎಂದು ಹೇಳಿzರು.

ಅಕ್ಟೋಬರ್ ೨೮ ರಿಂದ ಪ್ರಾರಂಭವಾಗುವ ಮೂರು ಹಂತದ ಮತದಾನದಲ್ಲಿ ತಮ್ಮ ಪಕ್ಷದ ಅಭ್ಯರ್ಥಿಗಳಿಗೆ ಬೆಂಬಲ ಕೋರಿರುವುದರಿಂದ ಜನತಾದಳಕ್ಕೆ (ಸಂಯಕ್ತ) ನೀಡುವ ಮತವು ನಾಳೆ ತಮ್ಮ ಮಕ್ಕಳ ವಲಸೆಗೆ ಒತ್ತಾಯಿಸುತ್ತದೆ ಎಂದು ಪಾಸ್ವಾನ್ ಬಿಹಾರದ ಮತದಾರರಿಗೆ ಮುಕ್ತ ಪತ್ರದಲ್ಲಿ ತಿಳಿಸಿದ್ದಾರೆ.

ಎಲ್‌ಜೆಪಿ ರಾಷ್ಟ್ರೀಯ ಪ್ರಜಾತಾಂತ್ರಿಕ ಮೈತ್ರಿಕೂಟಕ್ಕೆ (ಎನ್‌ಡಿಎ) ನಿತೀಶ ಕುಮಾರ್ ಅವರ ನಾಯಕತ್ವವನ್ನು ಒಪ್ಪಿಕೊಳ್ಳುವುದಿಲ್ಲ ಎಂದು ಪ್ರತಿಪಾದಿಸಲು ಪಕ್ಷದೊಂದಿಗಿನ "ಸೈದ್ಧಾಂತಿಕ ಭಿನ್ನಾಭಿಪ್ರಾಯಗಳನ್ನು" ಉಲ್ಲೇಖಿಸಿ, ಜೆಡಿಯು ವಿರುದ್ಧ ತನ್ನ ಅಭ್ಯರ್ಥಿಗಳನ್ನು ಕಣಕ್ಕಿಳಿಸಲು ಎಲ್‌ಜೆಪಿ ಭಾನುವಾರ ನಿರ್ಧರಿಸಿದೆ.

ಭಾರತೀಯ ಜನತಾ ಪಕ್ಷ (ಬಿಜೆಪಿ) ಎನ್‌ಡಿಎಯ ಪ್ರಮುಖ ಅಂಗಪಕ್ಷವಾಗಿದ್ದು, ಇದು ಈಗಾಗಲೇ ಕುಮಾರ್ ಅವರನ್ನು ರಾಜ್ಯದ ಬಣದ ನಾಯಕ ಎಂದು ಘೋಷಿಸಿದೆ. "ಇದು ಬಿಹಾರ ರಾಜ್ಯದ ಇತಿಹಾಸದಲ್ಲಿ ಅತ್ಯಂತ ನಿರ್ಣಾಯಕ ಕ್ಷಣವಾಗಿದೆ. ಇದು ರಾಜ್ಯದ ೧೨ ಕೋಟಿ ಜನರ ಜೀವನ ಮತ್ತು ಸಾವಿನ ಪ್ರಶ್ನೆಯಾಗಿದೆ ಮತ್ತು ನಮಗೆ ಕಳೆದುಕೊಳ್ಳಲು ಸಮಯವಿಲ್ಲ .... ಎಲ್‌ಜೆಪಿಗೆ ಮುಂದಿನ ಹಾದಿ ಸುಲಭವಲ್ಲ, ಆದರೆ ನಾವು ಹೋರಾಡುತ್ತೇವೆ ಮತ್ತು ಗೆಲ್ಲುತ್ತೇವೆ’ ಎಂದು ಪಾಸ್ವಾನ್ ಹೇಳಿದರು.

ಎಲ್ಲ ಎಲ್‌ಜೆಪಿ ಶಾಸಕರು ಪ್ರಧಾನಿ ನರೇಂದ್ರ ಮೋದಿಯವರ ನೇತೃತ್ವದಲ್ಲಿ ಕಾರ್ಯನಿರ್ವಹಿಸಲಿದ್ದಾರೆ ಎಂದು ಅವರು ನುಡಿದರು.

ರಾಷ್ಟ್ರೀಯ ಮಟ್ಟದಲ್ಲಿ ಪಾಸ್ವಾನ್ ಅವರ ಪಕ್ಷದಿಂದ ಔಪಚಾರಿಕವಾಗಿ ದೂರವಿರಲು ಜೆಡಿ (ಯು) ತನ್ನ ಮೈತ್ರಿ ಪಾಲುದಾರನನ್ನು ಸಂಪರ್ಕಿಸುತ್ತಿದೆ ಎಂಬ ವದಂತಿಗಳು ಸಹ ಹರಡಿವೆ. "ಮೋದಿಯವರು ಪ್ರಚಾರಕ್ಕಾಗಿ ಬಿಹಾರಕ್ಕೆ ಬಂದಾಗ ಮತ್ತು ವೇದಿಕೆಯಲ್ಲಿ ಮುಖ್ಯಮಂತ್ರಿಯ ಪಕ್ಕದಲ್ಲಿ ನಿಂತಾಗ ರಾಷ್ಟ್ರೀಯ ಮಟ್ಟದಲ್ಲಿ ಎಲ್‌ಜೆಪಿ ಮತ್ತು ಬಿಜೆಪಿ ನಡುವೆ ಸ್ವಯಂಚಾಲಿತ ಅಂತರ ಇರುತ್ತದೆ’ ಎಂದು ಜನತಾದಳ (ಯು) ನಾಯಕ ಕೆ.ಸಿ. ತ್ಯಾಗಿ ಹೇಳಿದರು

"ಎಲ್‌ಜೆಪಿ ರಾಷ್ಟ್ರಮಟ್ಟದೊಂದಿಗಿನ ಸಂಬಂಧವನ್ನು ಕೊನೆಗೊಳಿಸುವಂತೆ ನಾವು ಬಿಜೆಪಿಗೆ ಯಾವುದೇ ಔಪಚಾರಿಕ ಸಂದೇಶವನ್ನು ಕಳುಹಿಸಿಲ್ಲ. ಅವರು ತೀರ್ಮಾನಿಸುವರು’ ಎಂದು ಜೆಡಿಯು ಹಿರಿಯ ವಕ್ತಾರರು ಹೇಳಿದರು. ಜೆಡಿಯು ಮತ್ತು ಎಲ್‌ಜೆಪಿ ಅಭ್ಯರ್ಥಿಗಳ ನಡುವಣ ಸ್ಪರ್ಧೆಗಳ ಬಗೆಗಿನ ಪ್ರಶ್ನೆಗೆ, ತ್ಯಾಗಿ, "ಹಿರಿಯ ಬಿಜೆಪಿ ನಾಯಕರು ಬಂದು ಜೆಡಿಯು ಅಭ್ಯರ್ಥಿಗಳ ಪರವಾಗಿ ಪ್ರಚಾರ ಮಾಡಿದಾಗ, ಯಾವುದೇ ಗೊಂದಲ ಉಂಟಾಗುವುದಿಲ್ಲ" ಎಂದು ಹೇಳಿದರು.