ನಿವಾರ್ ಚಂಡಮಾರುತ ಹೊಡೆತಕ್ಕೆ ೫ ಬಲಿ, ಧರೆಗೆ ಒರಗಿದ ಮರ, ವಿದ್ಯುತ್ ಕಂಬಗಳು
ಚಂಡಮಾರುತದ ಪರಿಣಾಮವಾಗಿ ದಕ್ಷಿಣ ಭಾರತದ ತಮಿಳುನಾಡು, ಪುದುಚೇರಿ, ಆಂಧ್ರಪ್ರದೇಶ ಮತ್ತು ಕರ್ನಾಟಕದಲ್ಲಿ ಭಾರೀ ಮಳೆ ಸುರಿದಿದೆ.
ಚಂಡಮಾರುತವು ದಕ್ಷಿಣ ರಾಜ್ಯವಾದ ತಮಿಳುನಾಡಿನ ಸಮೀಪದಲ್ಲಿರುವ ಪುದುಚೇರಿ ನಗರದ ಬಳಿ ನೆಲಕ್ಕೆ ಅಪ್ಪಳಿಸಿದೆ. ಇದರೊಂದಿಗೆ ಗಂಟೆಗೆ ೧೩೦ ಕಿ.ಮೀ ವೇಗದಲ್ಲಿ (ಗಂಟೆಗೆ ೮೧ ಮೈಲಿಗಳು) ಗಾಳಿ ಬೀಸುತ್ತಿದೆ ಎಂದು ಭಾgತೀಯ ಹವಾಮಾನ ಇಲಾಖೆ ತಿಳಿಸಿದೆ.
ಚಂಡಮಾರುತದ ಭಾರಿ ಮಳೆಯಿಂದಾಗಿ ಅನೇಕ ದೊಡ್ಡ ವಾಹನ ತಯಾರಕರ ನೆಲೆಯಾಗಿರುವ ತಮಿಳುನಾಡಿ ಅತಿದೊಡ್ಡ ನಗರವಾದ ಚೆನ್ನೈ ನಗರದ ಹಲವು ಬೀದಿಗಳಲ್ಲಿ ಪ್ರವಾಹ ಉಂಟಾಗಿದೆ. ಚಂಡಮಾರುತದಿಂದಾಗಿ ಚೆನ್ನೈ ಮತ್ತು ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ಮರಗಳ ಉರುಳುವಿಕೆ, ನೀರಿನಲ್ಲಿ ಮುಳುಗುವಿಕೆ ಮತ್ತು ವಿದ್ಯುತ್ ಆಘಾತದಿಂದ ಕನಿಷ್ಠ ೫ ಮಂದಿ ಮೃತರಾಗಿದ್ದಾರೆ ಎಂದು ವರದಿಗಳು ಹೇಳಿವೆ.
ಆದರೆ ಸಾವಿನ ವರದಿಗಳ ಬಗ್ಗೆ ಪ್ರತಿಕ್ರಿಯಿಸಲು ಮುಖ್ಯಮಂತ್ರಿ ಕಚೇರಿಯ ವಕ್ತಾರರು ನಿರಾಕರಿಸಿದರು.
’ಅತ್ಯಂತ ತೀವ್ರವಾದ’ ಚಂಡಮಾರುತ ನಿವಾರ್ ಗುರುವಾರ ಮುಂಜಾನೆ ಪುದುಚೇರಿ ಬಳಿ ನೆಲಕ್ಕೆ ಅಪ್ಪಳಿಸಿರುವ ಹಿನ್ನೆಲೆಯಲ್ಲಿ ಮುಂದಿನ ಮೂರು ದಿನಗಳ ಕಾಲ ತಿರುವಣ್ಣಾಮಲೈ, ಕಡಲೂರು, ಕಲ್ಲಕುರಿಚಿ ಮತ್ತು ವಿಲ್ಲುಪುರಂನಲ್ಲಿ ತೀವ್ರ ಗುಡುಗು ಸಹಿತವಾದ ಭಾರಿ ಮಳೆ ಸುರಿಯಲಿದೆ ಎಂದು ತಮಿಳುನಾಡು ರಾಜ್ಯ ವಿಪತ್ತು ನಿರ್ವಹಣಾ ಪ್ರಾಧಿಕಾರ (ಎಸ್‌ಡಿಎಂಎ) ಎಚ್ಚರಿಕೆ ನೀಡಿತು. ಚೆಂಗಲ್ಪಟ್ಟು ಸೇರಿದಂತೆ ೧೯ ಜಿಲ್ಲೆಗಳಲ್ಲಿ ಗುಡುಗು ಸಹಿತ ಮಧ್ಯಮ ಮಳೆಯಾಗುವ ಸಾಧ್ಯತೆಯಿದೆ ಎಂದು ಅದು ಹೇಳಿತು.
ಏತನ್ಮಧ್ಯೆ, ತೀವ್ರವಾದ ಚಂಡಮಾರುತದ ಹೊಡೆತದಿಂದ ಉಂಟಾದ ಭಾರಿ ಮಳೆಯು ಪುದುಚೇರಿ ಮತ್ತು ಅದರ ಉಪನಗರಗಲ್ಲಿ ಅಲ್ಲೋಕ ಕಲ್ಲೋಲ ಉಂಟಾಗಿದೆ. ನೂರಾರು ಮರಗಳು ಉರುಳಿದ್ದು, ವಿದ್ಯುತ್ ಕಂಬಗಳಿಗೆ ಹಾನಿಯಾಯಿತು. ಜೊತೆಗೆ ಹಲವಾರು ಪ್ರದೇಶಗಳು ಪ್ರವಾಹದ ಅಡಿಯಲ್ಲಿ ಮುಳುಗಿದವು.
ಕೇಂದ್ರಾಡಳಿತ ಪ್ರದೇಶದ ಯಾವುದೇ ಭಾಗದಿಂದ ಇಲ್ಲಿಯವರೆಗೆ ಯಾವುದೇ ಪ್ರಾಣಹಾನಿ ಸಂಭವಿಸಿದ ವರದಿ ಬಂದಿಲ್ಲ. ಈ ಪಟ್ಟಣ ಮತ್ತು ಸುತ್ತಮುತ್ತಲಿನ ಮಳೆ ಹಾನಿಗೊಳಗಾದ ಪ್ರದೇಶಗಳಿಗೆ ಗುರುವಾರ ಭೇಟಿ ನೀಡಿದ ಮುಖ್ಯಮಂತ್ರಿ ವಿ ನಾರಾಯಣಸಾಮಿ ಸುದ್ದಿಗಾರರೊಂದಿಗೆ ಮಾತನಾಡುತ್ತಾ ಪುದುಚೇರಿಯಲ್ಲಿ ೨೩ ಸೆಂ.ಮೀ ಮಳೆಯಾಗಿದೆ. ಚಂಡಮಾರುತದಿಂದಾಗಿ ಯಾವುದೇ ಸಾವುಗಳು ವರದಿಯಾಗಿಲ್ಲ ಎಂದು ಅವರು ಹೇಳಿದರು. ಹೆಚ್ಚಿನ ವಸತಿ ವಸಾಹತುಗಳಿಗೆ ನೀರು ನುಗ್ಗಿದೆ. ನಿವಾಸಿಗಳು ಒಳಾಂಗಣದಲ್ಲಿಯೇ ಇದ್ದರು ಎಂದು ಅವರು ನುಡಿದರು.
ಕ್ಷಿಪ್ರವಾಗಿ ವಿದ್ಯುತ್ ಸರಬರಾಜನ್ನು ಪುನಃಸ್ಥಾಪಿಸಲು ಪ್ರಾದೇಶಿಕ ಸರ್ಕಾರವು ಕ್ರಮಗಳನ್ನು ಪ್ರಾರಂಭಿಸಿದೆ ಎಂದು ಮುಖ್ಯಮಂತ್ರಿ ಹೇಳಿದರು. ಇಲ್ಲಿಯವರೆಗೆ ೨,೦೦೦ ಜನರು ವಾಸಿಸುವ ವಿವಿಧ ಸ್ಥಳಗಳಲ್ಲಿ ಪರಿಹಾರ ಶಿಬಿರಗಳನ್ನು ತೆರೆಯಲಾಗಿದೆ. ಶಿಬಿರಗಳಲ್ಲಿ ಆಹಾರ ಮತ್ತು ಇತರ ಅಗತ್ಯ ವಸ್ತುಗಳ ಸರಬರಾಜು ಖಚಿತಪಡಿಸಲಾಗಿದೆ ಎಂದು ಅವರು ಹೇಳಿದರು.
ವಿವಿಧ ಹಂತಗಳಲ್ಲಿ ಬಿದ್ದ ಮರಗಳನ್ನು ತೆಗೆಯಲು ಅಗ್ನಿಶಾಮಕ ಮತ್ತು ರಕ್ಷಣಾ ಸೇವೆಗಳ ಸಿಬ್ಬಂದಿಯನ್ನು ನಿಯೋಜಿಸಲಾಗಿದೆ ಎಂದು ವಾಟ್ಸಾಪ್ ಸಂದೇಶದಲ್ಲಿ ಲೆಫ್ಟಿನೆಂಟ್ ಗವರ್ನರ್ ಕಿರಣ್ ಬೇಡಿ ಹೇಳಿದ್ದಾರೆ. ಬೌಲೆವಾರ್ಡ್‌ಗೆ ಸಮೀಪವಿರುವ ರೇನ್‌ಬೋ ನಗರ ವಸತಿ ಪ್ರದೇಶದಲ್ಲಿ ಪ್ರವಾಹದಲ್ಲಿ ಸಿಕ್ಕಿಹಾಕಿಕೊಂಡಿದ್ದ ಮಹಿಳೆ ಮತ್ತು ಆಕೆಯ ಮಗುವನ್ನು ಪೊಲೀಸರು ರಕ್ಷಿಸಿದ್ದಾರೆ ಎಂದು ಜಿಲ್ಲಾಧಿಕಾರಿ ಪೂರ್ವಾ ಗರ್ಗ್ ತಿಳಿಸಿದ್ದಾರೆ.
ಪುದುಚೇರಿ ಬಳಿ ಕರಾವಳಿಯನ್ನು ದಾಟಿದ ನಂತರ ನಿವಾರ್ ಚಂಡಮಾರುತ ಇನ್ನಷ್ಟು ಬಿರುಸು ಪಡೆಯಿತು ಎಂದು ಭಾರತೀಯ ಹವಾಮಾನ ಇಲಾಖೆ (ಐಎಂಡಿ) ತಿಳಿಸಿದೆ.
ಚಂಡಮಾರುತದಿಂದಾಗಿ ಪ್ರಾಣಹಾನಿ ಸಂಭವಿಸಿದ ಬಗ್ಗೆ ಯಾವುದೇ ವರದಿಗಳು ಬಂದಿಲ್ಲ. ಗೋಡೆ ಕುಸಿದ ಘಟನೆಗಳು ತಮಿಳುನಾಡಿನ ಕೆಲವು ಭಾಗಗಳಿಂದ ವರದಿಯಾಗಿದೆ ಎಂದು ರಾಜ್ಯ ಕಂದಾಯ ಸಚಿವ ಆರ್ ಬಿ ಉದಯಕುಮಾರ್ ತಿಳಿಸಿದರು.
ಈ ಹಿಂದೆ, ನಿವಾರ್ ೧೨೦-೧೩೦ ಕಿ.ಮೀ ವೇಗದಲ್ಲಿ ಗಾಳಿ ವೇಗದೊಂದಿಗೆ ಪುದುಚೇರಿ ಬಳಿ ಕರಾವಳಿ ದಾಟಲಿದೆ ಎಂದು ಐಎಂಡಿ ತಿಳಿಸಿತ್ತು, ೧೪೫ ಕಿ.ಮೀ. ವೇಗದೊಂದಿಗೆ ನಿವಾರ್ ಚಂಡಮಾರುತವು ಬುಧವಾರ ತಡರಾತ್ರಿ ಅಪ್ಪಳಿಸಲು ಆರಂಭಿಸಿತ್ತು.
ಪುದುಚೇರಿ ಬಳಿ ಕರಾವಳಿ ದಾಟಿ ನವೆಂಬರ್ ೨೫ -೨೬ರ ನಡುವಣ ರಾತ್ರಿ ೦೨.೩೦ ವೇಳೆಗೆ ಚಂಡಮಾರುತ ನೆಲಕ್ಕೆ ಅಪ್ಪಳಿಸುವುದು ಎಂದು ಐಎಂಡಿ ಟ್ವೀಟ್ ತಿಳಿಸಿತ್ತು.
’ಆ ಬಳಿಕ ಚಂಡಮಾರುತ ದುರ್ಬಲಗೊಳ್ಳುತ್ತದೆ" ಎಂದು ಅದು ಮತ್ತೊಂದು ಟ್ವೀಟ್‌ನಲ್ಲಿ ತಿಳಿಸಿತ್ತು.
ತಮಿಳುನಾಡಿನಲ್ಲಿ ಮಳೆ ಮುಂದುವರಿಕೆ
ತಮಿಳುನಾಡಿನಲ್ಲಿ ಮಳೆ ಮುಂದುವರಿಯುವ ಸಾಧ್ಯತೆ ಇದೆ ಎಂದು ಚೆನ್ನೈಯ ಹವಾಮಾನ ಇಲಾಖೆ ಉಪ ಮಹಾನಿರ್ದೇಶಕ ಎಸ್.ಬಾಲಚಂದ್ರನ್ ತಿಳಿಸಿದರು.
"ಚಂಡಮಾರುತವು ಈಗ ಭೂಪ್ರದೇಶದೊಳಗೆ ಇದೆ. ಆದಾಗ್ಯೂ, ಮಳೆ ಮತ್ತು ಬಲವಾದ ಗಾಳಿ ಕೂಡ ಇರುತ್ತದೆ" ಎಂದು ಅವರು ಹೇಳಿದರು.
ಮುಂದಿನ ಆರು ಗಂಟೆಗಳಲ್ಲಿ ತೀವ್ರ ಚಂಡಮಾರುತವು ಮತ್ತಷ್ಟು ದುರ್ಬಲಗೊಳ್ಳುತ್ತದೆ ಎಂದು ಅವರು ಹೇಳಿದರು. ಉದಯಕುಮಾರ್ ಅವರು ಪ್ರಾಣಹಾನಿ ಅಥವಾ ಬೆಳೆ ಹಾನಿಯ ಬಗ್ಗೆ ಯಾವುದೇ ವರದಿಗಳಿಲ್ಲ ಎಂದು ತಿಳಿಸಿದರು.
"ಮಳೆಯಿಂದಾಗಿ ಯಾವುದೇ ಪ್ರಾಣಹಾನಿ ಸಂಭವಿಸಿಲ್ಲ. ಜನರು ನಮಗೆ ಸಂಪೂರ್ಣ ಸಹಕಾರ ನೀಡಿದ್ದಾರೆ" ಎಂದು ಅವರು ಹೇಳಿದರು. ಕೆಲವು ಸ್ಥಳಗಳಿಂದ ಗೋಡೆ ಕುಸಿದ ಘಟನೆಗಳು ವರದಿಯಾಗಿವೆ ಎಂದು ಅವರು ನುಡಿದರು.
ಇಲ್ಲಿಯವರೆಗೆ ಪಡೆದ ಮಾಹಿತಿಗಳ ಪ್ರಕಾರ, ರಾಜ್ಯದಲ್ಲಿ ಬೆಳೆಗಳು ಮತ್ತು ತೋಪುಗಳು ಸುರಕ್ಷಿತವಾಗಿವೆ ಎಂದು ಉದಯಕುಮಾರ್ ಸುದ್ದಿಗಾರರಿಗೆ ಹೇಳಿದರು. ಏನಿದ್ದರೂ, ಪರಿಸ್ಥಿತಿಯನ್ನು ಪರಿಶೀಲಿಸಲಾಗುವುದು ಮತ್ತು ಅದರ ಫಲಿತಾಂಶ, ವಿಮೆ ಪಾವತಿ ಮತ್ತು ರೈತರಿಗೆ ಪರಿಹಾರವನ್ನು ಆಧರಿಸಿ, ಯಾವುದಾದರೂ ಇದ್ದರೆ, ಮುಖ್ಯಮಂತ್ರಿ ಕೆ ಪಳನಿಸ್ವಾಮಿ ಅವರು ಘೋಷಿಸುತ್ತಾರೆ ಎಂದು ಅವರು ಹೇಳಿದರು.
ಬುಧವಾರ ರಾತ್ರಿ ೮.೩೦ ರಿಂದ ಗುರುವಾರ ಮುಂಜಾನೆ ೨.೩೦ ರವರೆಗೆ ತಮಿಳುನಾಡಿನ ಕಡಲೂರಿನಲ್ಲಿ ಅತಿ ಹೆಚ್ಚು ಅಂದರೆ ೨೪.೬ ಸೆಂ.ಮೀ ಮಳೆಯಾಗಿದೆ, ನಂತರ ಪುದುಚೇರಿಯಲ್ಲಿ ೨೩.೭ ಸೆಂ.ಮೀ ಮಳೆಯಾಗಿದೆ. ಇದೇ ಅವಧಿಯಲ್ಲಿ ನಾಗಪಟ್ಟಣಂನಲ್ಲಿ ೬.೩ ಸೆಂ.ಮೀ, ಕಾರೈಕಲ್ ೮.೬ ಸೆಂ ಮತ್ತು ಚೆನ್ನೈ ೮.೯ ಸೆಂ.ಮೀ ಮಳೆಯಾಗಿದೆ.
ಏತನ್ಮಧ್ಯೆ, ಆದಾಯ, ನಾಗರಿಕ ಮತ್ತು ಪೊಲೀಸ್ ಅಧಿಕಾರಿಗಳು ಹೆವಿ ಡ್ಯೂಟಿ ಮೋಟಾರ್ ಉಪಕರಣಗಳು ಮತ್ತು ಬ್ಯಾಕ್‌ಹೋ ಲೋಡರ್‌ಗಳನ್ನು ಬಳಸಿ ಬೇರುಸಹಿತ ಉರುಳಿದ ಮರಗಳನ್ನು ಸಮನ್ವಯಗೊಳಿಸಿ ತೆಗೆಯುತ್ತಿದ್ದರು. ಆರಂಭಿಕ ಅಂದಾಜಿನ ಪ್ರಕಾರ, ತಮಿಳುನಾಡಿನಲ್ಲಿ ಮಾತ್ರ ೧೫೦ ಕ್ಕೂ ಹೆಚ್ಚು ಮರಗಳು ಉರುಳಿವೆ.
ಚಂಡಮಾರುತವು ಕರಾವಳಿಯನ್ನು ದಾಟಲು ಪ್ರಾರಂಭಿಸುತ್ತಿದ್ದಂತೆ, ಇಲ್ಲಿ ಸ್ವಲ್ಪ ಸಮಯದವರೆಗೆ ಮಳೆ ನಿಂತುಹೋಯಿತು. ಆದರೆ, ನಗರ ಮತ್ತು ಉಪನಗರ ತೀರಕ್ಕೆ ಹತ್ತಿರವಿರುವ ಕೆಲವು ಪ್ರದೇಶಗಳಲ್ಲಿ ಬಲವಾದ ಗಾಳಿಯೊಂದಿಗೆ ಮಳೆ ಮರಳಿತು. ಕಾಮರಾಜ್ ಸಲೈಯಿಂದ ಮರೀನಾ ಬೀಚ್‌ಗೆ ಹೋಗುವ ರಸ್ತೆಗಳು ಪ್ರವಾಹಕ್ಕೆ ಸಿಲುಕಿದವು ಮತ್ತು ನೀರಿನ ಅಲೆಗಳು ಮುಖ್ಯ ರಸ್ತೆಯವರೆಗೂ ತಲುಪಿದವು. ಇಲ್ಲಿ ಮೀನುಗಾರರು ತಮ್ಮ ದೋಣಿಗಳನ್ನು ಭದ್ರವಾಗಿ ಕಟ್ಟಿಹಾಕಿದ್ದರು.
ದೇಗುಲದಲ್ಲಿ ಆಶ್ರಯ ಪಡೆದ ಕೋತಿಗಳು
ಮಮಲ್ಲಾಪುರಂನಲ್ಲಿ ಮಳೆಯಾಗುತ್ತಿದ್ದಂತೆ, ಕೋತಿಗಳ ಪಡೆಗಳು ಪ್ರಾಚೀನ ಶ್ರೀ ಸ್ಥಲಶಯನ ಪೆರುಮಾಳ್ ದೇವಸ್ಥಾನದಲ್ಲಿ ಕಲ್ಲಿನಲ್ಲಿ ಕೆತ್ತಿದ ದೇವತೆಗಳ ಚಿತ್ರಗಳಿಂದ ಕೂಡಿದ ಅಲಂಕಾರಿಕ, ಗುಹೆಯಂತಹ ಕಮಾನುಗಳ ಕೆಳಗೆ ಆಶ್ರಯ ಪಡೆದವು.
No comments:
Post a Comment