ಬಿಹಾರ: ಮೋದಿ ಮ್ಯಾಜಿಕ್ ಕೆಲಸ ಮಾಡಿತೇ?
ಬಿಹಾರ ವಿಧಾನಸಭಾ ಚುನಾವಣೆಯ ಪ್ರಚಾರದ ಸಂದರ್ಭದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರು ಡಜನ್ ರ್‍ಯಾಲಿಗಳನ್ನು ನಡೆಸಿದ್ದರು. 2020 ನವೆಂಬರ್
11ರ ಮಂಗಳವಾರ ಮತಗಳ ಎಣಿಕೆ ನಡೆಯುತ್ತಿದ್ದಂತೆಯೇ ಪ್ರಧಾನಿ ಮೋದಿಯವರು ಎಲ್ಲೆಲ್ಲ ಸಭೆ ನಡೆಸಿದ್ದರೋ ಅಲ್ಲೆಲ್ಲ ಆಡಳಿತಾರೂಢ ರಾಷ್ಟ್ರೀಯ ಪ್ರಜಾತಾಂತ್ರಿಕ ಮೈತ್ರಿಕೂಟ (ಎನ್‌ಡಿಎ) ಅಭ್ಯರ್ಥಿಗಳು ಮುನ್ನಡೆ/ ವಿಜಯ ಸಾಧಿಸಿದ್ದು ಬೆಳಕಿಗೆ ಬಂದಿತು.
ಪ್ರಧಾನಿ ಮೋದಿ ಅವರು ಸಸಾರಂ, ಗಯಾ, ಭಾಗಲ್ಪುರ್, ದರ್ಭಂಗಾ, ಮುಜಾಫ್ಪರಪುರ, ಪಾಟ್ನಾ, ಚಪ್ರಾ, ಪೂರ್ವ ಚಂಪಾರನ್, ಸಮಸ್ತಿಪುರ, ಪಶ್ಚಿಮ ಚಂಪಾರನ್, ಸಹರ್ಸಾ ಮತ್ತು ಫೋರ್ಬೆಸ್‌ಗಂಜ್‌ಗಳಲ್ಲಿ ಚುನಾವಣಾ ರ್‍ಯಾಲಿಗಳನ್ನು ಉದ್ದೇಶಿಸಿ ಮಾತನಾಡಿದ್ದರು ಮತ್ತು ಎನ್‌ಡಿಎ ಅಭ್ಯರ್ಥಿಗಳ ಪರವಾಗಿ ಮತ ಯಾಚಿಸಿದ್ದರು.
ಭಾರತೀಯ ಜನತಾ ಪಕ್ಷದ (ಬಿಜೆಪಿ) ರೋಹಿತ್ ಪಾಂಡೆ ಅವರು ಭಾಗಲ್ಪುರದಲ್ಲಿ ಕಾಂಗ್ರೆಸ್ ಪ್ರತಿಸ್ಪರ್ಧಿ ಅಜಿತ್ ಶರ್ಮಾ ಅವರಿಗಿಂತ ಮುಂದಿದ್ದಾರೆ ಎಂದು ಭಾರತದ ಚುನಾವಣಾ ಆಯೋಗದ ಅಂಕಿ ಅಂಶಗಳು ತಿಳಿಸಿವೆ. ದರ್ಭಂಗದಲ್ಲಿ, ಎನ್‌ಡಿಎ ೧೦ ಸ್ಥಾನಗಳಲ್ಲಿ ಒಂಬತ್ತು ಸ್ಥಾನಗಳನ್ನು ಹೊಂದಿದೆ. ಭಾರತೀಯ ಜನತಾ ಪಕ್ಷದ (ಬಿಜೆಪಿ) ಅಭ್ಯರ್ಥಿ ಸುರೇಶ್ ಕುಮಾರ್ ಶರ್ಮಾ ಕೂಡ ಮುಜಾಫ್ಫರಪುರದಲ್ಲಿ ಮುನ್ನಡೆ ಸಾಧಿಸಿದರು. ಇದಲ್ಲದೆ, ಪಾಟ್ನಾದ ಹೆಚ್ಚಿನ ಸ್ಥಾನಗಳಲ್ಲಿ ಬಿಜೆಪಿ-ಜೆಡಿಯು ಮೈತ್ರಿ ಮೇಲುಗೈ ಸಾಧಿಸಿದೆ. ರಾಷ್ಟ್ರೀಯ ಜನತಾದಳದ ಸುಂದರ ಆನಂದ್ ಕೂಡ ಕಣದಲ್ಲಿದ್ದ ಸಹರ್ಸಾ ಸ್ಥಾನದಲ್ಲಿ ಬಿಜೆಪಿಯ ಅಲೋಕ್ ರಂಜನ್ ಮುನ್ನಡೆ ಸಾಧಿಸಿದರು.
ಭಾರತದ ಚುನಾವಣಾ ಆಯೋಗದಿಂದ ಲಭ್ಯವಿರುವ ಪ್ರವೃತ್ತಿಗಳ ಪ್ರಕಾರ, ರಾಜ್ಯದ ೨೪೩ ವಿಧಾನಸಭಾ ಸ್ಥಾನಗಳಲ್ಲಿ ಅರ್ಧಕ್ಕಿಂತಲೂ ಹೆಚ್ಚು ಸ್ಥಾನಗಳಲ್ಲಿ ಬಿಹಾರದ ಆಡಳಿತಾರೂಢ ಎನ್‌ಡಿಎ ತನ್ನ ಪ್ರತಿಸ್ಪರ್ಧಿಗಳಿಗಿಂತ ಮುಂದಿದೆ. ಮುಖ್ಯಮಂತ್ರಿ ನಿತೀಶಕುಮಾರ್ ನೇತೃತ್ವದ ತನ್ನ ಹಿರಿಯ ಮೈತ್ರಿ ಪಾಲುದಾರ ಜನತಾದಳವನ್ನು (ಯು) ಕೂಡಾ ಬಿಜೆಪಿ ಹಿಂದಿಕ್ಕಿದೆ.
ವಿಪಕ್ಷಗಳ ಕಡೆಯಲ್ಲಿ ತೇಜಸ್ವಿ ಯಾದವ್ ಅವರ ಆರ್‌ಜೆಡಿ, ಇತರ ಮಹಾ ಘಟಬಂಧನ್ ಅಥವಾ ಭವ್ಯ ಮೈತ್ರಿಯ ಪಾಲುದಾರರೊಂದಿಗೆ ಸ್ಪಷ್ಟ ವಿಜಯಗಳನ್ನು ಗಳಿಸಿದೆ. ಆರ್‌ಜೆಡಿ ತಾನು ಸ್ಪರ್ಧಿಸಿದ ೧೪೪ ಸ್ಥಾನಗಳಲ್ಲಿ ೭೦ ರಲ್ಲಿ ಮುನ್ನಡೆ ಸಾಧಿಸಿದೆ, ೭೦ ಅಭ್ಯರ್ಥಿಗಳನ್ನು ಕಣಕ್ಕಿಳಿಸಿದ ಕಾಂಗ್ರೆಸ್ ಕೇವಲ ೧೯ರಲ್ಲಿ ಮುಂದಿದೆ. ಆರ್‌ಜೆಡಿ ನೇತೃತ್ವದ ಭವ್ಯ ಮೈತ್ರಿಯಲ್ಲಿನ ಕಮ್ಯುನಿಸ್ಟ್ ಪಾರ್ಟಿ ಆಫ್ ಇಂಡಿಯಾ (ಮಾರ್ಕ್ಸ್ವಾದಿ-ಲೆನಿನಿಸ್ಟ್) ಲಿಬರೇಶನ್ ಅಥವಾ ಸಿಪಿಐ-ಎಂಎಲ್ ೧೪ ರಲ್ಲಿ, ಕಮ್ಯುನಿಸ್ಟ್ ಪಾರ್ಟಿ ಆಫ್ ಇಂಡಿಯಾ (ಸಿಪಿಐ) ಮೂರರಲ್ಲಿ ಮತ್ತು ಕಮ್ಯುನಿಸ್ಟ್ ಪಾರ್ಟಿ ಆಫ್ ಇಂಡಿಯಾ (ಮಾರ್ಕ್ಸ್ವಾದಿ) ಅಥವಾ ಸಿಪಿಐ (ಎಂ ) ಎರಡು ಕ್ಷೇತ್ರಗಳಲ್ಲಿ ಮುನ್ನಡೆ ಸಾಧಿಸಿದ್ದವು.
ಎಲ್ಲಾ ೨೪೩ ಸ್ಥಾನಗಳ ಪ್ರವೃತ್ತಿಗಳು ಲಭ್ಯವಾಗುತ್ತಿದ್ದಂತೆ, ಎನ್‌ಡಿಎ ಘಟಕಗಳು ೧೨೭ ಸ್ಥಾನಗಳಲ್ಲಿ ಮುಂದಿದ್ದು, ಬಿಜೆಪಿ ಅಭ್ಯರ್ಥಿಗಳು ೭೨ ಸ್ಥಾನಗಳಲ್ಲಿ ಮತ್ತು ಜೆಡಿಯು ಕೇವಲ ೪೭ ಸ್ಥಾನಗಳಲ್ಲಿ ಮುಂಚೂಣಿಯಲ್ಲಿದ್ದವು. ಬಿಜೆಪಿ ೧೧೦ ಸ್ಥಾನಗಳಿಗೆ ಸ್ಪರ್ಧಿಸಿದರೆ, ಜೆಡಿಯು ೧೧೫ ಸ್ಥಾನಗಳಲ್ಲಿ ಸ್ಪರ್ಧಿಸಿದೆ. ಒಂದು ಪಕ್ಷ ಅಥವಾ ಪಕ್ಷಗಳ ಮೈತ್ರಿಕೂಟಕ್ಕೆ ಸರಳ ಬಹುಮತ ಪಡೆಯಲು ೧೨೨ ಸ್ಥಾನಗಳು ಬೇಕಾಗುತ್ತವೆ.
ಮಾಜಿ ಬಾಲಿವುಡ್ ಸೆಟ್ ಡಿಸೈನರ್ ಮುಖೇಶ್ ಸಾಹ್ನಿಯ ವಿಕಾಸ ಶೀಲ ಇನ್ಸಾನ್ ಪಕ್ಷವು ವಿಧಾನಸಭಾ ಚುನಾವಣೆಗೆ ಸ್ವಲ್ಪ ಮುಂಚಿತವಾಗಿ ಎನ್‌ಡಿಎಗೆ ಸೇರ್ಪಡೆಗೊಂಡಿದ್ದು, ಅದು ಸ್ಪರ್ಧಿಸಿದ ೧೧ ಸ್ಥಾನಗಳಲ್ಲಿ ಆರರಲ್ಲಿ ಮುನ್ನಡೆ ಸಾಧಿಸಿದೆ.
ಎನ್‌ಡಿಎಯಿಂದ ಹೊರಗುಳಿದ ಮತ್ತು ಹೆಚ್ಚಿನ ಸಂಖ್ಯೆಯ ಬಿಜೆಪಿ ಮತ್ತು ಜೆಡಿಯು ಬಂಡುಕೋರರನ್ನು ಕಣಕ್ಕಿಳಿಸಿದ ಚಿರಾಗ್ ಪಾಸ್ವಾನ್ ನೇತೃತ್ವದ ಲೋಕ ಜನಶಕ್ತಿ ಪಕ್ಷವು ಕೇವಲ ಎರಡು ಸ್ಥಾನಗಳಲ್ಲಿ ಮುನ್ನಡೆ ಸಾಧಿಸಿದೆ. ಅಸಾದುದ್ದೀನ್ ಒವೈಸಿ ಅವರ ಆಲ್ ಇಂಡಿಯಾ ಮಜ್ಲಿಸ್-ಎ-ಇತ್ತೇಹಾದುಲ್ ಮುಸ್ಲೀಮೀನ್ (ಎಐಐಎಂಐಎಂ) ಮೂರು ಸ್ಥಾನಗಳಲ್ಲಿ ಮುಂದಿದೆ, ಬಹುಜನ ಸಮಾಜ ಪಕ್ಷ (ಬಿಎಸ್ಪಿ) ಒಂದರಲ್ಲಿ ಮತ್ತು ಸ್ವತಂತ್ರರು ಏಳು ಸ್ಥಾನಗಳಲ್ಲಿ ಮುಂದಿದ್ದರು.
ಬಿಜೆಪಿ ಏಕೈಕ ಅತಿದೊಡ್ಡ ಪಕ್ಷವಾಗಿ ಹೊರಹೊಮ್ಮಿದ್ದರೂ, ಆರ್‌ಜೆಡಿಯ ಎಣಿಕೆ ಮಾಡಿದ ಚಲಾವಣೆಯಾದ ಮತಗಳಲ್ಲಿ ಶೇಕಡಾ ೧೯.೮೯ ಮತಗಳನ್ನು ಗಳಿಸಿದೆ. ಆರ್‌ಜೆಡಿ ೨೨.೯೫ ಮತಗಳನ್ನು ಪಡೆದಿದೆ. ಆದಾಗ್ಯೂ, ಬಿಜೆಪಿಯು ತನ್ನ ಪಾಲುದಾರ ಜೆಡಿಯು ಜೊತೆಗೆ ಶೇಕಡಾ ೩೫.೪೩ ಮತಗಳನ್ನು ಪಡೆಯಲು ಸಶಕ್ತವಾಗಿದೆ. ಆರ್‌ಜೆಡಿ-ಕಾಂಗ್ರೆಸ್ ಮೈತ್ರಿಕೂಟಕ್ಕೆ ಶೇಕಡಾ ೩೨.೧೩ ಮತಗಳು ಲಭಿಸಿವೆ.
ಕೋವಿಡ್ -೧೯ ಸಾಂಕ್ರಾಮಿಕ ರೋಗದ ದೃಷ್ಟಿಯಿಂದ ವಿವಿಧ ಶಿಷ್ಟಾಚಾರಗಳು ಜಾರಿಯಲ್ಲಿರುವುದರಿಂದ ಮತಗಳ ಎಣಿಕೆಯು ನಿಧಾನವಾಗಿದ್ದು ಸಂಪೂರ್ಣ ಫಲಿತಾಂಶ ಬರಲು ತಡವಾಗಬಹುದು ಎಂದು ಚುನಾವಣಾ ಆಯೋಗ ಹೇಳಿದೆ.
No comments:
Post a Comment