ಜಿಎಚ್‌ಎಂಸಿ ಚುನಾವಣೆ: ಟಿಆರ್‌ಎಸ್ ಮುಂದೆ, ಬಿಜೆಪಿಗೆ 2ನೇ ಸ್ಥಾನ

 ಜಿಎಚ್‌ಎಂಸಿ ಚುನಾವಣೆ: ಟಿಆರ್‌ಎಸ್ ಮುಂದೆ, ಬಿಜೆಪಿಗೆ 2ನೇ ಸ್ಥಾನ

ಹೈದರಾಬಾದ್: ಗ್ರೇಟರ್ ಹೈದರಾಬಾದ್ ಮಹಾನಗರ ಪಾಲಿಕೆಯ ೧೫೦ ವಿಭಾಗಗಳಲ್ಲಿ ೧೪೬ ಫಲಿತಾಂಶಗಳ 2020 ಡಿಸೆಂಬರ್ 04ರ ಶುಕ್ರವಾರ ಘೋಷಣೆಯಾಗಿದ್ದು, ಆಡಳಿತಾರೂಢ ತೆಲಂಗಾಣ ರಾಷ್ಟ್ರ ಸಮಿತಿ (ಟಿಆರ್‌ಎಸ್) ತನ್ನ ಮುನ್ನಡೆ ಕಾಯ್ದುಕೊಂಡು, ಇದುವರೆಗೆ ೫೬ ವಿಭಾಗಗಳನ್ನು ಗೆದ್ದಿದೆ.

೪೬ ವಿಭಾಗಗಳನ್ನು ಗೆಲ್ಲುವ ಮೂಲಕ ಟಿಆರ್‌ಎಸ್‌ಗೆ ಬಿಜೆಪಿ ಪ್ರಮುಖ ಸವಾಲು ಒಡ್ಡಿದೆ. ಎಐಐಎಂ ೪೨ ಸ್ಥಾನಗಳೊಂದಿಗೆ ೩ನೇ ಸ್ಥಾನದಲ್ಲಿದ್ದರೆ, ಬದಿಗೆ ತಳ್ಳಲ್ಪಟ್ಟ ಕಾಂಗ್ರೆಸ್ ಪಕ್ಷವು ಕೇವಲ ಎರಡು ವಿಭಾಗಗಳನ್ನು ಪಡೆದುಕೊಂಡಿದೆ.

ಬಿಜೆಪಿ ತನ್ನ ಕಾರ್ಯಕ್ಷಮತೆಯನ್ನು "ನೈತಿಕ ಗೆಲುವು" ಎಂದು ಶ್ಲಾಘಿಸಿದರೆ, ೨೦೧೬ ರ ಚುನಾವಣೆಯಲ್ಲಿ ೮೮ ಸ್ಥಾನಗಳನ್ನು ಗೆದ್ದಿದ್ದ ಟಿಆರ್‌ಎಸ್ ಈ ಬಾರಿಯ ಕುಸಿತದ ಬಗ್ಗೆ ವಿಶ್ಲೇಷಿಸುವುದಾಗಿ ಹೇಳಿದೆ.

ಗೃಹ ಸಚಿವ ಅಮಿತ್ ಶಾ ಅವರು ಪಕ್ಷದ ಕಾರ್ಯಕರ್ತರನ್ನು ಅಭಿನಂದಿಸಿದರು ಮತ್ತು "ಪ್ರಧಾನಿ ಮೋದಿಯವರ ನೇತೃತ್ವದ ಬಿಜೆಪಿಯ ಅಭಿವೃದ್ಧಿಯ ರಾಜಕೀಯದಲ್ಲಿ ನಂಬಿಕೆ ಇಟ್ಟ’ ಮತದಾರರಿಗೆ ಕೃತಜ್ಞತೆ ಸಲ್ಲಿಸಿದರು. ಏತನ್ಮಧ್ಯೆ, ಪಕ್ಷವು ೨೦-೨೫ ಸ್ಥಾನಗಳನ್ನು ಕಳೆದುಕೊಂಡಿದೆ ಎಂದು ಟಿಆರ್‌ಎಸ್ ಸಚಿವ ಕೆ.ಟಿ.ರಾವ್ ಹೇಳಿದರು. "ನಾವು ಬಯಸಿದ ಫಲಿತಾಂಶವನ್ನು ಏಕೆ ಪಡೆಯಲಿಲ್ಲ್ಲ ಎಂಬುದರ ಕುರಿತು ಪರಿಶೀಲಿಸುತ್ತೇವೆ’ ಎಂದು ಅವರು ಹೇಳಿದರು.

ಚುನಾವಣಾ ಫಲಿತಾಂಶಗಳು ನಾಗರಿಕ ಸಂಸ್ಥೆಯ ೧೫೦ ವಿಭಾಗಗಳಲ್ಲಿ ೧,೧೨೨ ಅಭ್ಯರ್ಥಿಗಳ ಭವಿಷ್ಯವನ್ನು ನಿರ್ಧರಿಸುತ್ತದೆ. ಈ ವರ್ಷ, ಮೇಯರ್ ಹುದ್ದೆಯನ್ನು ಮಹಿಳೆಗೆ ಕಾಯ್ದಿರಿಸಲಾಗಿದೆ.

ಇದಕ್ಕೂ ಮುನ್ನ ಶುಕ್ರವಾರ, ತೆಲಂಗಾಣ ಹೈಕೋರ್ಟ್‌ನ ಆದೇಶವನ್ನು ಪಾಲಿಸಿದ ತೆಲಂಗಾಣ ರಾಜ್ಯ ಚುನಾವಣಾ ಆಯೋಗ ಬಾಣದ ಅಡ್ಡ-ಗುರುತು ಹಾಕಲಾಗಿದ್ದ ಮತಪತ್ರಗಳನ್ನು ಕೂಡಾ ಮಾನ್ಯ ಮತಗಳು ಎಂಬುದಾಗಿ ಪರಿಗಣಿಸಿ ಲೆಕ್ಕ ಹಾಕಲು ಅವಕಾಶ ನೀಡಿತು.

ರಬ್ಬರ್ ಅಂಚೆಚೀಟಿ ಬದಲಿಗೆ ಈ ವಿಶೇಷ ಗುರುತನ್ನು ಮಾನ್ಯ ಮತಗಳೆಂದು ಗುರುತಿಸಬೇಕು ಎಂದು ಆದೇಶ ನೀಡಿದ್ದ ಹೈಕೋರ್ಟ್ ಪ್ರಕರಣವನ್ನು ಮುಂದಿನ ವಿಚಾರಣೆಗಾಗಿ ಸೋಮವಾರಕ್ಕೆ ಮುಂದೂಡಿದೆ.

ಡಿಸೆಂಬರ್ ೧ ರಂದು ನಡೆದ ಚುನಾವಣೆಯಲ್ಲಿ ಒಟ್ಟು ೭೪.೬೭ ಲಕ್ಷ ಮತದಾರರಲ್ಲಿ ಶೇಕಡಾ ೪೬.೫೫ (೩೪.೫೦ ಲಕ್ಷ) ಮತದಾನವಾಗಿತ್ತು.