ಗಡಿಸ್ಥಿತಿ ನಮ್ಮ ನಿಯಂತ್ರಣದಲ್ಲಿದೆ: ಸೇನಾ ದಂಡನಾಯಕ ಜನರಲ್ ನರವಾಣೆ

ಗಡಿಸ್ಥಿತಿ ನಮ್ಮ ನಿಯಂತ್ರಣದಲ್ಲಿದೆ: ಸೇನಾ ದಂಡನಾಯಕ ಜನರಲ್ ನರವಾಣೆ

ನವದೆಹಲಿ: ‘ಚೀನಾದೊಂದಿಗಿನ ಗಡಿಯಲ್ಲಿನ ಪರಿಸ್ಥಿತಿ ಸಂಪೂರ್ಣ ನಮ್ಮ ನಿಯಂತ್ರಣದಲ್ಲಿದೆ ಎಂದು ಎಲ್ಲರಿಗೂ ಭರವಸೆ ನೀಡಲು ಬಯಸುತ್ತೇನೆ. ಗಡಿಯಲ್ಲಿನ ಪ್ರಕ್ಷುಬ್ಧತೆ ನಿವಾರಣೆಗೆ ಸಂಬಂಧಿಸಿದಂತೆ ಸೇನೆಯ ಕಮಾಂಡರ್ ಮಟ್ಟದ ಮಾತುಕತೆ ಸರಣಿಯು ಚಾಲನೆಯಲ್ಲಿದೆ’ ಎಂದು ಸೇನಾ ದಂಡನಾಯಕ ಜನರಲ್ ಮನೋಜ್ ಮುಕುಂದ್ ನರವಾಣೆ 2020 ಜೂನ್ 13ರ ಶನಿವಾರ ಹೇಳಿದರು.

ಚೀನಾದೊಂದಿಗಿನ ಗಡಿ ವಿವಾದ ಮತ್ತು ಸಂಘರ್ಷದ ಪರಿಸ್ಥಿತಿಗೆ ಸಂಬಂಧಿಸಿದಂತೆ ಅವರು ಮಾಧ್ಯಮಗಳೊಂದಿಗೆ ಮಾತನಾಡಿದರು.

‘ಸದ್ಯದ ಮಾತುಕತೆಗಳ ಫಲವಾಗಿ ಗಡಿಯಲ್ಲಿನ ಸಂಘರ್ಷದ ವಾತಾವರಣ ಸಾಕಷ್ಟು ಕಡಿಮೆಯಾಗಿದೆ. ಮಾತುಕತೆಗಳು ಇನ್ನೂ ಮುಂದುವರೆದಿವೆ. ಇದರ ಮೂಲಕ ನಾವು (ಭಾರತ ಮತ್ತು ಚೀನಾ) ಎಲ್ಲ ವ್ಯತ್ಯಾಸಗಳನ್ನು ಕೊನೆಗಾಣಿಸಲಿದ್ದೇವೆ. ಸದ್ಯ ಗಡಿಯಲ್ಲಿ ಪರಿಸ್ಥಿತಿ ನಿಯಂತ್ರಣದಲ್ಲಿದೆ,’ ಎಂದು ಅವರು ನುಡಿದರು.

ಪ್ಯಾಂಗೊಂಗ್ ತ್ಸೊ ಸರೋವರದ ಬಳಿ ಭಾರತ ನಿರ್ಮಿಸುತ್ತಿರುವ ಒಂದು ಸೇತುವೆ ಹಾಗೂ ಚೀನಾದ ಸೇನೆ ನಿರ್ಮಿಸಿರುವ ಒಂದು ಬಂಕರ್, ಉಭಯ ರಾಷ್ಟ್ರಗಳ ನಡುವಿನ ಉದ್ವಿಗ್ನತೆ ಶಮನಗೊಳಿಸುವ ಮಾತುಕತೆಗೆ ಅಡ್ಡಿಯಾಗಿ ಪರಿಣಮಿಸಿವೆ ಎಂಬ ವರದಿಗಳ ಹಿನ್ನೆಲೆಯಲ್ಲಿ ನರವಾಣೆ ಹೇಳಿಕೆಯು ಪ್ರಾಮುಖ್ಯತೆ ಗಳಿಸಿದೆ.

ಇದೇ ವೇಳೆಯಲ್ಲಿ ಅವರು ನೇಪಾಳದೊಂದಿಗಿನ ಗಡಿ ವಿವಾದದ ಕುರಿತೂ ಮಾತನಾಡಿದರು. ‘ನೇಪಾಳದೊಂದಿಗೆ ಭಾರತಕ್ಕೆ ಬಲವಾದ ಬಾಂಧವ್ಯವಿದೆ. ಭೌಗೋಳಿಕವಾಗಿ, ಸಾಂಸ್ಕೃತಿಕವಾಗಿ, ಐತಿಹಾಸಿಕವಾಗಿ ಮತ್ತು ಧಾರ್ಮಿಕವಾಗಿ ಎರಡೂ ದೇಶಗಳು ಪರಸ್ಪರ ಬೆಸೆದುಕೊಂಡಿವೆ. ಭಾರತ ಮತ್ತು ನೇಪಾಳದ ಜನರ ನಡುವೆ ಬಲವಾದ ಸಂಪರ್ಕಗಳಿವೆ. ಅವರೊಂದಿಗಿನ ನಮ್ಮ ಬಾಂಧವ್ಯ ಯಾವಾಗಲೂ ಸದೃಡ. ಭವಿಷ್ಯದಲ್ಲೂ ನಮ್ಮ ಸಂಬಂಧಗಳು ಸದೃಢವಾಗಿಯೇ ಉಳಿಯಲಿವೆ,’ ಎಂದು ನರವಾಣೆ ಪ್ರತಿಪಾದಿಸಿದರು.

‘ಜಮ್ಮು ಕಾಶ್ಮೀರದಲ್ಲಿ ನಮ್ಮ ಪಾಶ್ಚಿಮಾತ್ಯ ನೆರೆಯವರ ವಿರುದ್ಧ ಸಾಕಷ್ಟು ಯಶಸ್ಸನ್ನು ಕಂಡಿದ್ದೇವೆ. ಕಳೆದ ೧೦-೧೫ ದಿನಗಳಲ್ಲಿ ೧೫ಕ್ಕೂ ಹೆಚ್ಚು ಭಯೋತ್ಪಾದಕರನ್ನು ಹೊಡೆದುರುಳಿಸಿದ್ದೇವೆ. ಇದು ಸೇನೆಯ ತೀವ್ರ ಹಾಗೂ ಸಮನ್ವಯ ಕಾರ್ಯಾಚರಣೆಯ ಫಲ’ ಎಂದು ನರವಾಣೆ ಹೇಳಿದರು.

‘ಭಯೋತ್ಪಾದಕರ ವಿರುದ್ಧದ ಹೆಚ್ಚಿನ ಕಾರ್ಯಾಚರಣೆಗಳು ಸ್ಥಳೀಯರು ಒದಗಿಸಿದ ಮಾಹಿತಿಯ ಮೇಲೆ ನಡೆದಿವೆ. ಸ್ಥಳೀಯರು ಭಯೋತ್ಪಾದನೆ ವಿರುದ್ಧ ಬೇಸರಗೊಂಡಿದ್ದಾರೆ. ಪರಿಸ್ಥಿತಿಯು ಸಹಜ ಸ್ಥಿತಿಗೆ ಬರಬೇಕೆಂದು ಅವರು ಬಯಸುತ್ತಾರೆ’ ಎಂದು ಸೇನಾ ಮುಖ್ಯಸ್ಥ ನರವಾಣೆ ನುಡಿದರು.

ಭಾರತೀಯ ಸೇನಾ ಅಕಾಡೆಮಿಯಲ್ಲಿ ತರಬೇತಿ ಮುಗಿಸಿ ಹೊರಬರುತ್ತಿರುವ ಜಂಟಲ್‌ಮನ್  ಕೆಡೆಟ್‌ಗಳನ್ನು ಉದ್ದೇಶಿಸಿ ಮಾತನಾಡಿದ ನರವಾಣೆ ’ಚೀನಾದೊಂದಿಗಿನ ನಮ್ಮ ಗಡಿಯುದ್ದಕ್ಕೂ ಸಂಪೂರ್ಣ ಪರಿಸ್ಥಿತಿ ನಿಯಂತ್ರಣದಲ್ಲಿದೆ ಎಂದು ನಾನು ಎಲ್ಲರಿಗೂ ಭರವಸೆ ನೀಡಲು ಬಯಸುತ್ತೇನೆ. ಕೋರ್ ಕಮಾಂಡರ್ ಮಟ್ಟದ ಮಾತುಕತೆಗಳೊಂದಿಗೆ ಪ್ರಾರಂಭವಾದ ಮಾತುಕತೆಗಳ ಸರಣಿಯು ಪ್ರಸ್ತುತ ಸ್ಥಳೀಯ ಮಟ್ಟದಲ್ಲಿ ಸಮಾನ ಶ್ರೇಣಿಯ ಕಮಾಂಡರ್‌ಗಳ ನಡುವೆ ನಡೆಯುತ್ತಿದೆ’ ಎಂದು ಹೇಳಿದರು.

’ದೇಶವು ಕಷ್ಟಕರ ಸಮಯವನ್ನು ಹಾದುಹೋಗುತ್ತಿದೆ. ಅದರ ಸುರಕ್ಷತೆ ಮತ್ತು ಗೌರವವು ಯುವ ಅಧಿಕಾರಿಗಳ, ಸೇನಾ ನಾಯಕರ ಸಾಮರ್ಥ್ಯವನ್ನು ಅವಲಂಬಿಸಿರುತ್ತದೆ ಎಂದು ನರವಾಣೆ ನುಡಿದರು.

ಪಾಸಿಂಗ್ ಕೆಡೆಟ್ ಪೆರೇಡ್‌ನ ಪರಿಶೀಲನಾ ಅಧಿಕಾರಿಯಾಗಿ ಇಲ್ಲಿನ ಭಾರತೀಯ ಮಿಲಿಟರಿ ಅಕಾಡೆಮಿಯಲ್ಲಿ ಸಜ್ಜನರ ಕೆಡೆಟ್‌ಗಳನ್ನು ಉದ್ದೇಶಿಸಿ ಮಾತನಾಡಿದ ಜನರಲ್ ನರವಾಣೆ ’ಈ ಕೆಡೆಟ್‌ಗಳನ್ನು ಅತ್ಯಂತ ಭೀಕರ ಸನ್ನಿವೇಶಗಳಲ್ಲಿ ಸೈನ್ಯಕ್ಕೆ ಅಧಿಕಾರಿಗಳಾಗಿ ನಿಯೋಜಿಸಲಾಗುತ್ತಿದೆ ಮತ್ತು ಅವರ ಮಿಲಿಟರಿ ತರಬೇತಿಯು ಉನ್ನತ ಗುಣಮಟ್ಟವು ಹೊರಬರಲು ಸಹಾಯ ಮಾಡುತ್ತz’ ಎಂದು ಹೇಳಿದರು.

ಪೆರೇಡಿನಲ್ಲಿ ಸೇನೆಗೆ ನಿಯೋಜಿಸಲಾದ ಒಟ್ಟು ೪೨೩ ಕೆಡೆಟ್Uಳು ಪಾಲ್ಗೊಂಡಿದ್ದರು. ಇವರಲ್ಲಿ ದೇಶದಿಂದ ಪಾಲ್ಗೊಂಡವರು ೩೩೩ ಮಂದಿ ಮತ್ತು ಸ್ನೇಹಪರ ವಿದೇಶಗಳಿಂದ ಪಾಲ್ಗೊಂಡ ೯೦ ಮಂದಿ ಸೇರಿದ್ದಾರೆ.

"ಇದು ದೇಶಕ್ಕೆ ಕಷ್ಟದ ಸಮಯ. ದೇಶದ ಸುರಕ್ಷತೆ ಮತ್ತು ಗೌರವವು ಸೇನಾ ನಾಯಕರಾಗಿ ನಿಮ್ಮ ಸಾಮರ್ಥ್ಯಗಳನ್ನು ಅವಲಂಬಿಸಿರುತ್ತದೆ. ನಿಮ್ಮ ದೇಶವಾಸಿಗಳ ನಿರೀಕ್ಷೆಗೆ ತಕ್ಕಂತೆ ನೀವು ಬದುಕಬೇಕು. ನೀವು ಏನೇ ಮಾಡಿದರೂ ಅವರ ಕಲ್ಯಾಣಕ್ಕಾಗಿ ಎಂದು ನೀವು ಖಚಿತಪಡಿಸಿಕೊಳ್ಳಬೇಕು" ಎಂದು ನರವಾಣಿ ಸಲಹೆ ಮಾಡಿದರು.

’ಯಾವುದೇ ಉತ್ತಮ ಅಥವಾ ಕೆಟ್ಟ ರೆಜಿಮೆಂಟ್‌ಗಳಿಲ್ಲ, ಇರುವುದು ಉತ್ತಮ ಅಧಿಕಾರಿಗಳು ಮಾತ್ರ. ನಿಮ್ಮ ಜನರೊಂದಿಗೆ ಒಂದಾಗಿ. ಅವರ ನಂಬಿಕೆ ಮತ್ತು ವಾತ್ಸಲ್ಯವನ್ನು ಗೆಲ್ಲಿ. ಅವರು ನಿಮಗಾಗಿ ಯುದ್ಧಗಳನ್ನು ಗೆಲ್ಲುತ್ತಾರೆ" ಎಂದು ನರವಾಣೆ ಹೇಳಿದರು.

ತಮ್ಮ ಹೊಸ ಪಾತ್ರವನ್ನು ಉತ್ಸಾಹದೊಂದಿಗೆ ನಿರ್ವಹಿಸಿ ಎಂದು ಕೆಡೆಟ್‌ಗಳಿಗೆ ಸೂಚಿಸಿದ ಸೇನಾ ಮುಖ್ಯಸ್ಥರು, ’ನಿಮ್ಮ ಜನರ ಬಗ್ಗೆ ಸಹಾನುಭೂತಿ ಇರಲಿ. ಮಾರ್ಗ ಕಠಿಣವಾದಾಗ, ಎಲ್ಲವೂ ಕಳೆದುಹೋದಾಗ ನಿಮ್ಮ ಜನರ ಮನೋಭಾವವೇ ನಿಮಗೆ ಗೆಲ್ಲಲು ಸಹಾಯ ಮಾಡುತ್ತದೆ’ ಎಂದು ಹೇಳಿದರು.

’ನಿಯೋಜಿತ ಅಧಿಕಾರಿಗಳಾಗಿ ತಮ್ಮ ಮೊದಲ ಹೆಜ್ಜೆ ಇಡುತ್ತಿರುವ ಜಂಟಲ್‌ಮನ್  ಕೆಡೆಟ್‌ಗಳು ಯುದ್ಧತಂತ್ರದ ಮತ್ತು ಕಾರ್ಯಾಚರಣೆಯ ಕ್ಷೇತ್ರದಲ್ಲಿ ನಿರ್ಧಾರಗಳನ್ನು ತೆಗೆದುಕೊಳ್ಳುವುದರ ಜೊತೆಗೆ ನೈತಿಕ ಸಮಸ್ಯೆಗಳನ್ನು ಬಗೆಹರಿಸಬೇಕಾಗುತ್ತದೆ ಮತ್ತು ಅವರಿಗೆ ಮಾರ್ಗದರ್ಶನ ಮಾಡಬೇಕಾಗುತ್ತದೆ. ಅಂತಹ ನಿರ್ಣಾಯಕ ಕ್ಷಣಗಳಲ್ಲಿ ಭಾರತದ ಸಂವಿಧಾನದ ಮುನ್ನುಡಿಯಲ್ಲಿ ತಿಳಿಸಲಾದ ಪ್ರಮುಖ ಮೌಲ್ಯಗಳು ನಿಮಗೆ ಮಾರ್ಗದರ್ಶಕ ಬೆಳಕಾಗಿರಲಿ" ಎಂದು ಸೇನಾ ಮುಖ್ಯಸ್ಥರು ಹೇಳಿದರು.

ಜಾತಿ, ಮತ ಮತ್ತು ಧರ್ಮದ ಸಣ್ಣ ಪರಿಗಣನೆಗಳಿಂದ ಮೇಲೇರಲು ಕೆಡೆಟ್‌ಗಳನ್ನು ಕೋರಿದ ಅವರು, ’ಸೇನೆಯು ತಾರತಮ್ಯ ಮಾಡುವುದಿಲ್ಲ. ಬಾಹ್ಯ ಬೆದರಿಕೆಗಳನ್ನು ಒಳಗೊಂಡಿರುವುದರ ಹೊರತಾಗಿ ನೀವು ದೇಶವನ್ನು ಅಸ್ಥಿರಗೊಳಿಸುವ ಆಂತರಿಕ ಶಕ್ತಿಗಳನ್ನು ಹೊgಕ್ಕೆ ದಬ್ಬ ಬೇಕಾಗಬಹುದು’ ಎಂದು ನುಡಿದರು.

"ನಿಮ್ಮ ವೃತ್ತಿಜೀವನದ ಶರತ್ಕಾಲದಲ್ಲಿ ನೀವು ಅಂತಿಮವಾಗಿ ಪಡೆಯುವ ಸ್ಥಾನವಲ್ಲ ಮುಖ್ಯವಲ್ಲ, ನಿಮ್ಮ ರಾಷ್ಟ್ರಕ್ಕೆ ನೀವು ಎಷ್ಟು ಗೌರವಯುತವಾಗಿ ಸೇವೆ ಸಲ್ಲಿಸಿದ್ದೀರಿ ಎಂಬುದು ಮುಖ್ಯ" ಎಂದು ಸೇನಾ ಮುಖ್ಯಸ್ಥರು ಕಿವಿಮಾತು ಹೇಳಿದರು.

ಕೊರೋನವೈರಸ್ ಸಾಂಕ್ರಾಮಿಕ ರೋಗದಿಂದಾಗಿ ಈ ಕಾರ್ಯಕ್ರಮಕ್ಕೆ ಹಾಜರಾಗಲು ಅವಕಾಶವಿಲ್ಲದ ಜಂಟಲ್‌ಮನ್ ಕೆಡೆಟ್‌ಗಳ ಪೋಷಕರಿಗೆ ನೀಡಿದ ಸಂದೇಶದಲ್ಲಿ ಸೇನಾ ಮುಖ್ಯಸ್ಥರು, "ನಿನ್ನೆಯವರೆಗೆ ಅವರು (ಜಂಟಲ್‌ಮನ್ ಕೆಡೆಟ್‌ಗಳು) ನಿಮ್ಮ ಮಕ್ಕಳಾಗಿದ್ದರು ಆದರೆ ನಾಳೆಯಿಂದ ಅವರು ನಮ್ಮವರಾಗುತ್ತಾರೆ" ಎಂದು ಹೇಳಿದರು. ಯಾವುದೇ ಸಂದರ್ಭದಲ್ಲೂ ಅವರ ಜೊತೆಗಿರುತ್ತೇವೆ ಎಂದು ನರವಾಣೆ ಭರವಸೆ ನೀಡಿದರು.

ಪೋಷಕರ ಉತ್ಸಾಹಭರಿತ ಸಂದಣಿ ಇಲ್ಲದ ಕಾರಣ ಪೆರೇಡ್ ಈ ಬಾರಿ ಸಪ್ಪೆಯಾಗಿತ್ತು. ಹೆಲಿಕಾಪ್ಟರುಗಳಿಂದ  ಹೂವಿನ ದಳಗಳ ಸಿಂಚನದಂತಹ ವಿಶೇಷಗಳೂ ಈ ಬಾರಿ ಇರಲಿಲ್ಲ.