ಪಾಕಿಸ್ತಾನದ ಶೇಖುಪುರದಲ್ಲಿ ಬಸ್ಸಿಗೆ ರೈಲು ಡಿಕ್ಕಿ: ೨೯ ಸಿಖ್ ಯಾತ್ರಿಕರ ಸಾವು

ಪಾಕಿಸ್ತಾನದ ಶೇಖುಪುರದಲ್ಲಿ ಬಸ್ಸಿಗೆ ರೈಲು ಡಿಕ್ಕಿ:
೨೯ ಸಿಖ್ ಯಾತ್ರಿಕರ ಸಾವು

ಇಸ್ಲಾಮಾಬಾದ್: ಪಾಕಿಸ್ತಾನದ ಶೇಖುಪುರ ಬಳಿ ಮಿನಿಬಸ್ ಮತ್ತು ರೈಲು ನಡುವೆ  2020 ಜುಲೈ 03ರ ಶುಕ್ರವಾರ ಸಂಭವಿಸಿದ ಅಪಘಾತದಲ್ಲಿ ೨೯ ಮಂದಿ ಸಾವನ್ನಪ್ಪಿದ್ದಾರೆ. ಮೃತರಲ್ಲಿ ಬಹುತೇಕ ಮಂದಿ ಸಿಖ್ ಯಾತ್ರಿಕರು ಎಂದು ವರದಿಗಳು ತಿಳಿಸಿದವು.

ಕರಾಚಿಗೆ ಹೊgಟಿದ್ದ ಶಾ ಹುಸೇನ್ ಎಕ್ಸ್‌ಪ್ರೆಸ್ ರೈಲು ಮಾನವರಹಿತ ರೈಲ್ವೆ ಕ್ರಾಸಿಂಗ್‌ನಲ್ಲಿ ಯಾತ್ರಾರ್ಥಿಗಳನ್ನು ಕರೆದೊಯ್ಯುತ್ತಿದ್ದ ಬಸ್ಸಿಗೆ ಡಿಕ್ಕಿ ಹೊಡೆದು ಈ ಅಪಘಾತ ಸಂಭವಿಸಿದೆ. ಯಾತ್ರಿಕರು ಪೇಶಾವರದಿಂದ ಪಯಣ ಹೊರಟಿದ್ದರು. ಅಪಘಾತದ ಸಮಯದಲ್ಲಿ ವ್ಯಾನಿನಲ್ಲಿ ೨೫-೨೭ ಜನರು ಇದ್ದರು ಎಂದು ಪೊಲೀಸರು ತಿಳಿಸಿದರು.

ಸಂತ್ರಸ್ತರ ರಕ್ಷಣಾ ಕಾರ್‍ಯಾಚರಣೆಗಾಗಿ ರೈಲ್ವೆ ಮತ್ತು ಜಿಲ್ಲಾ ರಕ್ಷಣಾ ತಂಡಗಳು ಸ್ಥಳಕ್ಕೆ ಧಾವಿಸಿವೆ ಎಂದು ಪಾಕಿಸ್ತಾನ ರೈಲ್ವೆ ಅಧಿಕಾರಿ ತಿಳಿಸಿದ್ದಾರೆ. ಗಾಯಾಳುಗಳನ್ನು ಶೇಖುಪುರ ಆಸ್ಪತ್ರೆಗೆ ಸಾಗಿಸಲಾಗಿದ್ದು, ಕೆಲವರ ಸ್ಥಿತಿ ಗಂಭೀರವಾಗಿದೆ ಎಂದು ವರದಿ ತಿಳಿಸಿತು.

ಅಪಘಾತ ಸಂಭವಿಸಿದ ಕ್ರಾಸಿಂಗ್ ಗೇಟ್ ಮುಚ್ಚಲಾಗಿತ್ತು. ಆದರೆ ಕೋಚ್ ಚಾಲಕ ಕ್ರಾಸಿಂಗ್‌ನಲ್ಲಿ ಕಾಯುವ ಬದಲು ಶಾರ್ಟ್‌ಕಟ್ ತೆಗೆದುಕೊಳ್ಳಲು ಪ್ರಯತ್ನಿಸಿರಬಹುದು, ಇದರಿಂದಾಗಿ ಅಪಘಾತ ಸಂಭವಿಸಿದೆ ಎಂದು ಸ್ಥಳೀಯ ಪೊಲೀಸ್ ಅಧಿಕಾರಿಯೊಬ್ಬರು ತಿಳಿಸಿದರು.

ಪಾಕಿಸ್ತಾನದ ಸಿಖ್ ಗುರುದ್ವಾರ ಪ್ರಬಂzಕ ಸಮಿತಿಯ ಪ್ರಧಾನ ಕಾರ್ಯದರ್ಶಿ ಸರ್ದಾರ್ ಅಮೀರ್ ಸಿಂಗ್ ಅವರ ಪ್ರಕಾರ, ಮೃತರು ಮೂರು ಅಥವಾ ನಾಲ್ಕು ಕುಟುಂಬಗಳಿಗೆ ಸೇರಿದವರಾಗಿದ್ದಾರೆ.

ಯಾತ್ರಿಕರು ನಂಕಾನಾ ಸಾಹಿಬ್‌ಗೆ ಭೇಟಿ ನೀಡಿದ ನಂತರ ಪೇಶಾವರಕ್ಕೆ ಹಿಂದಿರುಗುತ್ತಿದ್ದರು. ಅಲ್ಲಿ ಅವರು ಸಂಬಂಧಿಕರನ್ನು ಭೇಟಿ ಮಾಡಲು ಹೋಗಿದ್ದರು. ಯಾತ್ರಿಕರ ಬೆಂಗಾವಲು ವಾಹನ ಇನ್ನೂ ಇಬ್ಬರು ತರಬೇತುದಾರರನ್ನು ಒಳಗೊಂಡಿತ್ತು. ಆದರೆ ಇವರಿಬ್ಬರು ಮತ್ತೊಂದು ಮಾರ್ಗಕ್ಕೆ ತಿರುಗಿದ್ದು, ಸುರಕ್ಷಿತರಾಗಿದ್ದಾರೆ ಎಂದು ವರದಿ ತಿಳಿಸಿದೆ.

ಪಾಕಿಸ್ತಾನದ ಪ್ರಧಾನಿ ಇಮ್ರಾನ್ ಖಾನ್ ಅವರು ಸಿಖ್ ಯಾತ್ರಿಕರು ನಂಕನಾ ಸಾಹಿಬ್‌ನಿಂದ ಹಿಂದಿರುಗುತಿದ್ದರು ಎಂದು ಹೇಳಿದರು. ಗಾಯಾಳುಗಳಿಗೆ ಸರಿಯಾದ ವೈದ್ಯಕೀಯ ಸೌಲಭ್ಯ ನೀಡಲಾಗುವುದು ಎಂದು ಅವರು ನುಡಿದರು.

"ಈ ಮಧ್ಯಾಹ್ನ ಶೇಖುಪುರ ಬಳಿಯ ರೈಲ್ವೆ ಕ್ರಾಸಿಂಗಿನಲ್ಲಿ ಸಂಭವಿಸಿದ ಅಪಘಾತದಲ್ಲಿ ಕನಿಷ್ಠ ೨೯ ಮಂದಿ ಸಾವನ್ನಪ್ಪಿರುವುದಕ್ಕೆ ತೀವ್ರ ದುಃಖಿತನಾಗಿದ್ದೇನೆ. ಹೆಚ್ಚಿನ ಸಂಖ್ಯೆಯಲ್ಲಿದ್ದ ಸಿಖ್ ಯಾತ್ರಿಕರು ನಂಕಾನಾ ಸಾಹಿಬ್ ನಿಂದ ಹಿಂದಿರುಗಿದ್ದರು’ ಎಂದು ಖಾನ್ ಟ್ವೀಟ್ ಮಾಡಿದರು. ’ಗಾಯಾಳುಗಳಿಗೆ ಸರಿಯಾದ ವೈದ್ಯಕೀಯ ಸೇವೆ ಒದಗಿಸುವಂತೆ ನಿರ್ದೇಶನ ನೀಡಿದ್ದೇನೆ’ ಎಂದು ಖಾನ್ ತಿಳಿಸಿದ್ದಾರೆ.

ಸಿಖ್ ಯಾತ್ರಾರ್ಥಿಗಳು ವಾಯುವ್ಯ ನಗರ ಪೇಶಾವರ ಮೂಲದವರು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ ಎಂದು ಸುದ್ದಿ ಸಂಸ್ಥೆ ವರದಿ ಮಾಡಿದೆ.