ಇಂಡಿಯಾಗೇಟಿನಲ್ಲಿ ನೇತಾಜಿ ಪ್ರತಿಮೆ, ʼರಾಜಪಥʼವಾಯಿತು ʼಕರ್ತವ್ಯಪಥ”

 ಇಂಡಿಯಾಗೇಟಿನಲ್ಲಿ ನೇತಾಜಿ ಪ್ರತಿಮೆ, ʼರಾಜಪಥʼವಾಯಿತು ʼಕರ್ತವ್ಯಪಥ”

ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿ ಅವರು 2022 ಸೆಪ್ಟೆಂಬರ್‌ 8ರ ಗುರುವಾರ ಇಂಡಿಯಾ ಗೇಟಿನಲ್ಲಿ ಸ್ವಾತಂತ್ರ್ಯ ಯೋಧ ನೇತಾಜಿ ಸುಭಾಷ್ ಚಂದ್ರ ಬೋಸ್ ಅವರ ಪ್ರತಿಮೆಯನ್ನು ಅನಾವರಣಗೊಳಿಸಿದರು ಮತ್ತು ಹೊಸದಾಗಿ ನಾಮಕರಣಗೊಂಡ ʼಕರ್ತವ್ಯ ಪಥʼವನ್ನು ಉದ್ಘಾಟಿಸಿದರು. ಇದರೊಂದಿಗೆ ಬ್ರಿಟಿಷ್‌ ವಸಾಹತುಶಾಹಿಯ ಸಂಕೇತಗಳನ್ನು ಭಾರತವು ಅಳಿಸಿಹಾಕಿತು.

ಇಂಡಿಯಾಗೇಟಿನಲ್ಲಿ ಇದುವರೆಗೂ ಜಾರ್ಜ್‌ ದೊರೆಯ ಪ್ರತಿಮೆ ಇತ್ತು. ಅದನ್ನು ತೆಗೆದು ಇದೀಗ 28 ಅಡಿ ಎತ್ತರದ ನೇತಾಜಿ ಅವರ ಭವ್ಯವಾದ ಪ್ರತಿಮೆಯನ್ನು ಸ್ಥಾಪಿಸಲಾಗಿದೆ.

ಈ ಸಂದರ್ಭಕ್ಕೆ ಸಾಕ್ಷಿಯಾಗಲು ಈ ವಿಡಿಯೋ ನೋಡಿ:

ರಾಷ್ಟ್ರಪತಿ ಭವನದಿಂದ ಇಂಡಿಯಾ ಗೇಟ್‌ವರೆಗಿನ ʼಕರ್ತವ್ಯಪಥʼವು  ಕೆಂಪು ಗ್ರಾನೈಟ್ ನಡಿಗೆ ಪಥಗಳನ್ನು (ವಾಕ್‌ ವೇ) ಹೊಂದಿದ್ದು, ಸುತ್ತಲೂ ಹಸಿರು, ನವೀಕರಿಸಿದ ಕಾಲುವೆಗಳು, ರಾಜ್ಯವಾರು ಆಹಾರ ಮಳಿಗೆಗಳು, ಹೊಸ ಸೌಕರ್ಯ ಬ್ಲಾಕ್‌ಗಳು ಮತ್ತು ಮಾರಾಟ ಕಿಯೋಸ್ಕ್‌ಗಳನ್ನು ಹೊಂದಿದೆ.

ಸರ್ಕಾರದ ಪ್ರಕಾರ, ಹಿಂದಿನ ರಾಜಪಥವು ಅಧಿಕಾರದ ಐಕಾನ್ ಆಗಿತ್ತು. ಅದೀಗ ʼಕರ್ತವ್ಯ ಪಥʼ ಆಗುವ ಮೂಲಕ ಸಾರ್ವಜನಿಕ ಮಾಲೀಕತ್ವ ಮತ್ತು ಸಬಲೀಕರಣದ ಉದಾಹರಣೆಯಾಗಿರುವುದನ್ನು ಸಂಕೇತಿಸುತ್ತದೆ. ಇದರೊಂದಿಗೆ ಇಂಡಿಯಾ ಗೇಟಿನಲ್ಲಿ ನೇತಾಜಿ ಸುಭಾಷ್ ಚಂದ್ರ ಬೋಸ್ ಅವರ ಪ್ರತಿಮೆಯ ಅನಾವರಣವು ವಸಾಹತುಶಾಹಿ ಮನಸ್ಥಿತಿಯ ಯಾವುದೇ ಕುರುಹುಗಳನ್ನು ಕಿತ್ತುಹಾಕಿʼ ಎಂಬುದಾಗಿ ಹೇಳಿರುವ ಪ್ರಧಾನಿಯ ನವಭಾರತದ  ʼಅಮೃತಕಾಲʼದ ಎರಡನೇ ʼಪಂಚಪ್ರಾಣʼ ಎನಿಸಿದೆ.

ಇಂಡಿಯಾ ಗೇಟ್‌ ಸಮೀಪ ಸಿಪಿಡಬ್ಲ್ಯೂಡಿಯು  ಐದು ಮಾರಾಟ ವಲಯಗಳನ್ನು ಸ್ಥಾಪಿಸಿದೆ, ಅಲ್ಲಿ ತಲಾ 40 ಮಾರಾಟಗಾರರಿಗೆ ಅನುಮತಿ ನೀಡಲಾಗುತ್ತದೆ. ಇಂಡಿಯಾ ಗೇಟ್ ಬಳಿ ಎರಡು ಬ್ಲಾಕ್‌ಗಳು ತಲಾ ಎಂಟು ಅಂಗಡಿಗಳನ್ನು ಹೊಂದಿರುತ್ತದೆ. ಕೆಲವು ರಾಜ್ಯಗಳು ತಮ್ಮ ಆಹಾರ ಮಳಿಗೆಗಳನ್ನು ಸ್ಥಾಪಿಸಲು ತಮ್ಮ ಆಸಕ್ತಿಯನ್ನು ತೋರಿಸಿವೆ. ಮೋದಿ ಸರ್ಕಾರದ ಮಹತ್ವಾಕಾಂಕ್ಷೆಯ ಸೆಂಟ್ರಲ್ ವಿಸ್ಟಾ ಮರುಅಭಿವೃದ್ಧಿ ಯೋಜನೆಯ ಅಡಿಯಲ್ಲಿ ಸಂಪೂರ್ಣ ಪ್ರದೇಶವನ್ನು ನವೀಕರಿಸಲಾಗಿದೆ.

ಎಲ್ಲವನ್ನೂ ಹೊಸದಾಗಿ ಮರುಅಭಿವೃದ್ಧಿಪಡಿಸಿದ ರಾಜಪಥವನ್ನು ಪ್ರಧಾನಮಂತ್ರಿ ನರೇಂದ್ರ ಮೋದಿಯವರು ʼಕರ್ತವ್ಯ ಪಥʼ ಎಂಬ ಹೊಸ ಹೆಸರಿನಲ್ಲಿ  ಉದ್ಘಾಟಿಸಿದರು.

ʼಕರ್ತವ್ಯಪಥʼದ ಸೊಬಗನ್ನು ಕೆಳಗೆ  ಕ್ಲಿಕ್‌ ಮಾಡಿ ನೋಡಿ:

  ರಾಷ್ಟ್ರಪತಿ ಭವನದಿಂದ ಇಂಡಿಯಾ ಗೇಟ್‌ವರೆಗೆ ಹೊಸದಾಗಿ ನಾಮಕರಣಗೊಂಡ ಕರ್ತವ್ಯ ಪಥವನ್ನು ಉದ್ಘಾಟಿಸಿ ಮಾತನಾಡಿದ ಪ್ರಧಾನಿ ನರೇಂದ್ರ ಮೋದಿ, ಇಂದು ನಾವು ವಸಾಹತುಶಾಹಿ ಭೂತಕಾಲವನ್ನು ತೊಡೆದುಹಾಕಿದ್ದೇವೆ. ವಸಾಹತುಶಾಹಿಯ ಪ್ರತೀಕವಾದ ‘ಕಿಂಗ್ಸ್‌ವೇ’ ಒಂದು ಇತಿಹಾಸವಾಗಲಿದೆ ಮತ್ತು ಅದನ್ನು ಶಾಶ್ವತವಾಗಿ ಅಳಿಸಿಹಾಕಲಾಗಿದೆ ಎಂದು ಘೋಷಿಸಿದರು.

ʼಕರ್ತವ್ಯ.ಪಥʼದ ರೂಪದಲ್ಲಿ ಹೊಸ ಯುಗ ಪ್ರಾರಂಭವಾಗಿದೆ. ನಾವು ವಸಾಹತುಶಾಹಿಯ ಮತ್ತೊಂದು ಸಂಕೇತದಿಂದ ಹೊರಬಂದಿರುವುದಕ್ಕಾಗಿ ದೇಶದ ಎಲ್ಲ ಜನರನ್ನು ನಾನು ಅಭಿನಂದಿಸುತ್ತೇನೆ.ʼ ಎಂದು ಹೇಳಿದರು.

ಇಂಡಿಯಾ ಗೇಟಿನಲ್ಲಿ ನೇತಾಜಿ ಸುಭಾಷ್ ಚಂದ್ರ ಬೋಸ್ ಅವರ 28 ಅಡಿ ಎತ್ತರದ ಪ್ರತಿಮೆಯನ್ನು ಅನಾವರಣಗೊಳಿಸಿದ ನಂತರ, , “ಭಾರತವು ಸುಭಾಷ್ ಚಂದ್ರ ಬೋಸ್ ತೋರಿಸಿದ ಮಾರ್ಗವನ್ನು ಅನುಸರಿಸಿದ್ದರೆ, ದೇಶವು ಹೊಸ ಎತ್ತರವನ್ನು ತಲುಪುತ್ತಿತ್ತು; ಆದರೆ  ಅವರು ಮರೆತುಹೋದದ್ದು ದುಃಖದ ವಿಚಾರ” ಎಂದು ಪ್ರಧಾನಿ ನುಡಿದರು.

 “ಇಂದು ದೇಶವು ಬ್ರಿಟಿಷರ ಕಾಲದಿಂದ ಇದ್ದ ವಿವಿಧ ಕಾನೂನುಗಳನ್ನು ಬದಲಾಯಿಸಿದೆ. ರಾಷ್ಟ್ರೀಯ ಶಿಕ್ಷಣ ನೀತಿಯ ಮೂಲಕ ಈಗ ದೇಶದ ಯುವಕರು ಅನ್ಯ ಭಾಷೆಯ ಒತ್ತಡದಿಂದ ಮುಕ್ತರಾಗುತ್ತಿದ್ದಾರೆ. ಭಾರತದ ಜನರನ್ನು ಗುಲಾಮರಾಗಿಸಿದ್ದ ಬ್ರಿಟಿಷರಿಗೆ ರಾಜಪಥವಾಗಿದ್ದ ಇದು ವಸಾಹತುಶಾಹಿಯ ಸಂಕೇತವಾಗಿತ್ತು. ಆದರೆ ಈಗ, ಭಾರತದ ವಾಸ್ತುಶಿಲ್ಪವು ಬದಲಾಗಿದೆ ಮತ್ತು ಅದರ ಆತ್ಮವೂ ಬದಲಾಗಿದೆ” ಎಂದು ಮೋದಿ ಹೇಳಿದರು.

“ಕಳೆದ 8 ವರ್ಷಗಳಲ್ಲಿ ನಾವು ನೇತಾಜಿ ಸುಭಾಷ್ ಚಂದ್ರ ಅವರ ಛಾಪು ಹೊಂದಿರುವ ಹಲವಾರು ನಿರ್ಧಾರಗಳನ್ನು ತೆಗೆದುಕೊಂಡಿದ್ದೇವೆ. ಬೋಸ್. ಅವರು ಅಂಡಮಾನ್ ಮತ್ತು ನಿಕೋಬಾರ್ ದ್ವೀಪಗಳಲ್ಲಿ ರಾಷ್ಟ್ರಧ್ವಜವನ್ನು ಹಾರಿಸಿದ 'ಅಖಂಡ ಭಾರತ'ದ ಮೊದಲ ಮುಖ್ಯಸ್ಥರಾಗಿದ್ದರು.”

“ಇಂಡಿಯಾ ಗೇಟಿನಲ್ಲಿ ನೇತಾಜಿ ಸುಭಾಷ್ ಚಂದ್ರ ಬೋಸ್ ಅವರ ಪ್ರತಿಮೆಯನ್ನು ಸ್ಥಾಪಿಸುವ ಮೂಲಕ ದೇಶವು ಸಶಕ್ತ ರಾಷ್ಟ್ರಕ್ಕಾಗಿ ಹೊಸ ಮಾರ್ಗವನ್ನು ಸ್ಥಾಪಿಸಿದೆ ಎಂದು ಪ್ರಧಾನಿ ಹೇಳಿದರು.

 “ಇಂದು ನೇತಾಜಿ ಸುಭಾಷ್ ಚಂದ್ರ ಬೋಸ್ ಅವರ ಬೃಹತ್ ಪ್ರತಿಮೆಯನ್ನು ಇಂಡಿಯಾ ಗೇಟ್ ಬಳಿ ಸ್ಥಾಪಿಸಲಾಗಿದೆ. ಬ್ರಿಟಿಷರ ಆಳ್ವಿಕೆಯಲ್ಲಿ ಇಲ್ಲಿ ಬ್ರಿಟಿಷರ ಪ್ರತಿನಿಧಿಯ ಪ್ರತಿಮೆ ಇತ್ತು. ನೇತಾಜಿ ಅವರ ಪ್ರತಿಮೆ ಸ್ಥಾಪನೆಯೊಂದಿಗೆ, ನಾವು ಸಶಕ್ತ ಭಾರತಕ್ಕಾಗಿ ಹೊಸ ಮಾರ್ಗವನ್ನು ಸ್ಥಾಪಿಸಿದ್ದೇವೆ ಎಂದು ಅವರು ಹೇಳಿದರು.

ಈ ಹಿಂದೆ ರಾಜ್‌ಪಥ್ ಎಂದು ಕರೆಯಲಾಗುತ್ತಿದ್ದ ರಾಷ್ಟ್ರಪತಿ ಭವನದಿಂದ ಇಂಡಿಯಾ ಗೇಟ್‌ವರೆಗಿನ ರಸ್ತೆಯ ಕರ್ತವ್ಯ ಪಥವನ್ನು ಉದ್ಘಾಟಿಸಿದ ನಂತರ ಮಾತನಾಡಿದ ಪ್ರಧಾನಿ ನರೇಂದ್ರ ಮೋದಿ, ಅಭಿವೃದ್ಧಿ ಯೋಜನೆಯಲ್ಲಿ ತೊಡಗಿರುವ ಕಾರ್ಮಿಕರು ಅಥವಾ 'ಶ್ರಮಜೀವಿ'ಗಳಿಗೆ ಧನ್ಯವಾದ ಅರ್ಪಿಸಿದರು.

 “ಅವರು ಇದನ್ನು ನಿರ್ಮಿಸಿದ್ದು ಮಾತ್ರವಲ್ಲದೆ ಇತರರಿಗೂ ʼಕರ್ತವ್ಯʼದ ದಾರಿ ತೋರಿಸಿದ್ದಾರೆ. "ಮರುಅಭಿವೃದ್ಧಿಪಡಿಸಿದ ಸೆಂಟ್ರಲ್ ವಿಸ್ಟಾಕ್ಕಾಗಿ ಇಲ್ಲಿ ಕೆಲಸ ಮಾಡಿದವರು (ಶ್ರಮಜೀವಿಗಳು) ಜನವರಿ 26 ರಂದು ನನ್ನ ವಿಶೇಷ ಅತಿಥಿಯಾಗಿರುತ್ತಾರೆ" ಎಂದು ಮೋದಿ ಹೇಳಿದರು.